或許你堅信：聖誕應該普天同慶，暱埋浪漫不如大班朋友嘻哈盡興！喺香港不外乎酒吧包場開P劈到天明。太傷身啦啩，我寧願遠走馬交，幾個朋友喺私房菜包場，有得飲之餘仲有好嘢食，聖誕應該係咁先啱o架嘛！
記者：曾冠輝
攝影：王文忠
模特兒：May
星級酒店廚 抵食6道菜
多年前確係試過一班朋友過大海，夾埋屈喺一間酒店房，半夜大夥兒夜遊馬交，行到邊周街坐到邊，夠晒青春浪蕩吧！不過此刻青春不再，寧可選擇一個舒服又夠privacy的環境食飯、傾偈、開P，我有誠意好介紹。
「喜好」是澳門鮮見的私房菜之一，仲要以地舖形式經營，都幾膽粗粗。皆因澳門食風不及香港吹得盛，對於甚麼私房菜不私房菜，俗啲講句：佢理你個屁！到呢幾年多咗大型酒店先稍為好啲，多咗嘴刁客，不過私房菜依然少見，數埋唔夠10間。喜好主打意大利菜，無他，兩位年輕大廚都曾任職星級酒店，學得一身意菜上乘武功，當然唔好嘥：「我哋希望以平民化嘅價錢做出有質素而正宗嘅西餐。」雖然佢叫自己做私房菜，但格局似一間餐廳多啲，食客除了可以order每日specialdish，亦有alacarte或常設菜式可以揀。晚上則可預訂度身訂做的私房menu，按你要求或依季節時令或任大廚發板的5、6道菜式，味道完全是酒店級水準。如果人夠多，8-10位直情可以包起二樓搞個私房party，仲設電視、DVD連Wii都有，感覺就似租咗人哋屋企嚟開P，兼且玩完就食飯來張口。手上已有最新鮮熱鬧的聖誕餐單手抄本，6道菜包括日本帶子、長腳蟹、鵝肝、大蝦、羊架……老實講我覺得每位$498係超值！
d.喜好
電話：（853）28825663
地址：氹仔飛能便度街112-114號泉悅花園地下D舖
BBQ食材夠揼本
一班人，燒嘢食都好。但事前要買料兼凍冰冰抵住北風狂吹，聖誕假期隨時延長，點解？多咗日病假囉！如是者或可試試暱埋室內，我指是真正用炭堅燒嘢食：「喂！聖誕流流乜你咁睇唔開？」唔怕中炭毒，位於凱旋門的東瀛十八番正正有日式炭燒烤，全澳門只此一家。
「阿女，知唔知燒嘢食最緊要咩呀？料？唔係呀，係炭呀，無炭點燒呀！」東瀛十八番當然有炭用，而且用上日本備長炭。此炭確係非一般，表面一層銀白灰色，用上超過攝氏一千度燒成，燃燒起來火更猛更烈兼且持久襟燒，不少日本料理燒烤都會用上此炭，聲稱其放出之遠紅外線能更有效燒熟食材。炭之外當然是食材，聽住：和牛肩、和牛腿肉、特上雪花肥牛、黑豚肉、鮮活日本飽魚……正是餐廳特別為聖誕而設的燒烤套餐，全部用上日本高級食材俾你自己燒，鮑魚上枱依然生猛活潑非常新鮮，活燒食落唔嚡有咬口，中間肉厚軟腍；和牛更唔使講，略燒，食到滿口油香。
e.東瀛十八番
地址：新口岸皇朝區城市日大馬路澳門凱旋門３樓
價錢：20/12-1/1燒烤套餐或和食套餐每位$498
網址： http://www.larcmacau.com
橋景和食藍鰭吞拿
仍然是和食，不過呢度主打食料理，仲加上靚景。江戶是澳門連鎖日本料理店，這家在壹號廣場，開張都未夠一年。12月24日起推出聖誕套餐，9道和式料理列陣迎賓。當中最最最吸引是藍鰭吞拿三式壽司，用上腦天、合桃肉、目赤肉等部份，魚味極濃而油份夠。而你又有無留意日本料理甚少有靚景，大都是困在室內專心食。此店則特別設有戶外露天部份，對開就見過氹仔的大橋景，遇上放煙花的日子呢度必然爆滿，可惜聖誕沒有此環節。
f.江戶日本料理
電話：（853）28722829
地址：澳門壹號廣場236-238號舖
價錢：聖誕、除夕及元旦套餐每位$628