「喂！仲有兩個禮拜，使唔使咁早呀？」男人係咁，聖誕都已殺埋身仲大安旨意闊佬懶理，雖不是個浪漫種子也應該照顧身邊伴侶需要，點都要一年浪漫一次吧！唔使太遠嘅，近近哋澳門經已足夠。不過，勸你訂房趁手！
記者：曾冠輝
攝影：王文忠
模特兒：May
鳴謝：新濠天地
米芝蓮白松露餐
從來對米芝蓮口味懷疑，始終是鬼佬味蕾，佢愛的不如我愛的。但能連任的則作別論，因保持水準從來不易，跟男人一樣。摘下2010米芝蓮一星的Aurora，在剛公佈的「2011」繼續榜上有名。正好趁聖誕帶honey嚐一夜米芝蓮聖誕大餐。
平日的Aurora是家正宗至極的意大利餐廳，聖誕檔期普天同慶，平安夜先變陣成任食自助餐，聖誕夜再推5道菜或7道菜的套餐，兩者不等於質素有別，因意大利主廚依然坐鎮。Michele絕對是個一絲不苟的人，用上最當造的食材入饌。Michele：「我在亞洲已工作了好些年，熟知東方人口味，但我不會刻意遷就，有時只略略加入一點東方料理的烹調法，出來依然是地道的意大利味道。」以為簡單的風乾牛肉菜式，表面鋪滿芝麻菜外，竟還有薄薄一片片的，遠遠傳來濃烈氣息，細看即時碌大雙眼，竟是最最最矜貴的意大利白松露，搭上風乾牛肉就像畫龍點睛，把鹹香瞬間提升。話晒米芝蓮，連白松露都玩埋，仲遇上聖誕仲唔開天索價？平安夜每位$528，聖誕夜5道菜每位$788，價錢夠晒不可思議。
a.Aurora奧羅拉
地址：氹仔廣東大馬路新濠鋒10樓
價錢：平安夜海鮮自助餐每位$528；聖誕夜5道菜晚餐每位$788，7道菜$988
網址： http://www.altiramacau.com
大師日式按摩夠到位
我知道honey平日工作辛苦，一餐飽足也難消疲勞，惟有spa方能回春。剛好漾日Spa最近請來日式按摩大師TerryLiew進駐。Terry是新加坡日本指壓按摩學校的創辦人，自從一次腰背傷後，發現正宗日式指壓按摩的好處，治好了傷患，也盡得真傳，決心發揚光大：「日式按摩其實保留了最正宗最古老的中國按摩方法，溫和得來能夠針對穴位和患處，功效顯著。」見Terry手勢輕鬆，卻非常到位，但又無話椎心痠痛，非常舒服，按後脫胎換骨一身輕。
除了Terry手勢，我估honey更鍾意呢個名為TheLove的sparoom。室內除了spa床還設蒸氣房，旁邊還有雙人床和私人客廳俾你攤唞，推門仲可步出小庭園，面前一個privatepool都咪話唔尊貴，十足去咗poolvilla。暱埋relax吓兼二人世界一番。
b.漾日
地址：新濠天地TheCrownTowers3樓
價錢：即日至12/12由Terry主理之日本指壓按摩療程$1,080/60分鐘，13/12-31/1由Terry親傳之理療師主理則$880，二人LoveVilla：$2,000/50分鐘
住宿套票：每晚$2,488起，包早餐、spa優惠及$500餐券等
網址： http://www.cityofdreamsmacau.com
38樓最浪漫風景
米芝蓮餐、二人共spa，或許都未夠浪漫。趁日落西山下又未落得晒之時，趕快回到新濠鋒直上38樓的38Lounge。別忘記新濠鋒在氹仔岸邊站得筆直，居高臨下正是180°廣闊景致，遙遙對望正是對岸澳門夜景。特別是日落時分，酒吧的戶外部份可以看到盡染成一片橙紅的日落景色。要浪漫，呢度贏晒！可惜，採訪當天剛好錯過了最美一幕，幸好還未閉幕，到聖誕當天趕得切就得嘞！入夜後不等於一切告終，食完飯再返嚟，還可趕上酒吧新加的liveband表演，輕談輕唱過聖誕。
c.38Lounge
地址：新濠鋒38樓
TravelMemo
持香港居民身份證毋須簽證。澳門駐港旅遊局：28388680
噴射飛航單程船票$134起。噴射飛航電話：28593333
1港元約兌1.02澳門幣（文中所列價錢為澳門幣）
220V，三扁腳插座
澳門
明日多雲，17-21℃
