經過三日三夜嘅努力，華華終於八到邊個係新世界（017）元老梁志堅（堅叔）嘅接班人嘞！根據路邊社消息，呢個人叫做陳觀展，洋名好似叫Gary，年過半百，為人低調到爆，佢已經喺兩個月前到咗新世界向鄭裕彤（彤叔）報到，當然，仲要同堅叔做吓交接嘅工作咁啦。而未入彤叔馬房之前，佢係越秀企業副總經理；仲有，原來佢係嚟自廣州嘅！
陳觀展原為越秀副總
陳生係廣州中山大學同華南理工大學畢業生，喺越秀嗰陣，負責過唔少大型項目，好似集合甲級寫字樓、五星級酒店同購物商場嘅廣州國際金融中心，佢就有份參與。至於佢點認識彤叔？據聞係因為工作關係，先識咗彤叔長孫鄭志剛，跟住再識埋彤叔囉！
同71歲嘅堅叔比，陳生仍然非常嫩口，唔少嘢仲要跟前輩慢慢學。唔知係咪咁，據聞暫時佢都唔會takeover堅叔所有嘅工作，至於話彤叔一家畀幾多銀禮聘陳生過檔，呢part暫時未八到，但係以彤叔鋤Dee都萬萬聲一隻，相信出手應該唔會低囉！
陳觀展履歷
‧52歲
‧廣州中山大學理學學士
‧廣州華南理工大學環境化學工程工學碩士
‧曾執教於廣州華南理工大學，擁有大學講師及高級工程師資格
‧曾在廣州市政府辦公廳擔任處長等職務
‧2004年加入越秀企業
‧傳過檔新世界發展