今年敏妮可謂相當「黑仔」,咁大個女第一次入醫院就要做手術,仲一不離二。
敏妮次次出trip,都會盡興而歸,啱啱呢次都唔例外,不過唔係盡「興」,而係發「㷫」,喺機場俾醫管局護士攔途截住,原來敏妮發燒至攝氏38.6度。相信最希望2010年早啲過去嘅人,敏妮應該係其中一個。
敏妮今次去南韓嘅首爾,可以話係有幸有不幸,不幸者除咗上述發燒事件,仲有係臨出發先嚟軍演,幾驚發出外遊警示要取消行程。
至於幸運者,就係因為局勢不穩,所以韓圜下跌。部門秘書係精明靚太,遲啲陪寶貝女去南韓shopping,知道敏妮呢期去首爾,所以晨早就叫敏妮幫佢喺韓國機場換定啲韓圜。
換外幣 機場找換店唔抵
好多香港人都知,喺韓國機場出海關後,左邊嘅兌換店,兌換率較高。不過,朋友叫敏妮如果已有小量韓圜在手,唔急於即時去「血拼」,不妨到明洞嘅找換店先至兌換韓圜。
就以今次幫秘書靚太兌換為例,喺機場找換店,1港元換到141韓圜,去到明洞嘅找換店,1港元換到143韓圜。雖然只係差距2韓圜,但如果換5000蚊港紙,就多1萬韓圜,夠喺CaffePascucci飲兩杯大嘅Cappuccino有找。
錢使晒即刻收手 不簽卡
講開外遊「血拼」,敏妮有一個習慣,同敏妮嘅爸爸過大海玩兩手一樣,佢出發之前預咗幾多錢去賭都好,錢使晒就收手,唔會簽卡、唔補飛再換多啲錢使。
好多人離開咗香港就缺乏自制能力,結果外遊返港變成「卡奴」。量力而為,適可而止,咁無論外遊定返港都一樣開心。
溫敏妮
http://wanmanli.com/blogs/