田二少上月中退出自由黨，隨即被傳與葉劉行埋會加盟新民黨，自由黨主席劉健儀形容為「另結新歡」。葉劉噚日公開呢段地下情，宣佈田二少已入黨，透露田二少退出自由黨後，兩人即刻「一路有接觸」，至於呢段政治戀情幾時撻着，葉劉好似明星回應緋聞咁，笑笑口話「唔記得幾時」。
唔肯講邊個做主動
政治結合講郎情妾意，被問到搭上田二少邊個做主動，中間有冇媒人撮合時，葉劉一概話「好難講」，至於田二少入黨原因，葉劉咁講：「如果田生有志參加直選，咁佢係要加緊工作嘅，要分秒必爭嘛」。言下之意，留在自由黨浪費時間。
新民黨下周開大會選舉首任主席同一眾當家，據知該黨已開始招聘社區主任，首要係搵人打點新界西地區工作，幫助田二少落區。
一對新人笑，舊人卻鬧分手，委任區議員方國珊噚日終於宣佈退出自由黨，明年冇包袱獨立參選，大家都輕鬆晒。劉健儀話方國珊退黨當日，攞咗自由黨500個派街坊嘅暖包，話如果方國珊唔介意有自由黨logo，歡迎佢代自由黨送出。唉，既然唔捨得自由黨物資，何必退黨呢？