藝進同學會98年曾演出舞台劇《才子亂點俏佳人》，當年有份演出的林家棟相隔12年後再演同劇同角色，但輩份由新丁變老鬼。長江後浪推前浪，提到師弟林峯電眼冧爆女粉絲，家棟得個恨字：「我有都電吓先啦，冇之嘛，不知幾羨慕。」
由藝進同學會及香港話劇團聯合製作的舞台劇《才子亂點俏佳人》，將於下周四至日假元朗劇院開鑼，12年前有份演同一舞台劇的林家棟、盧海鵬和李國麟等再踏台板，新加入則有祝文君及黃嘉樂等。
新丁變老鬼
日前在上環綵排，眾人準時出現且死記三粒鐘對白連走位冇難度，認真專業。家棟笑說：「12年前呢套劇做過，目的係畀新同學上，家我哋變咗老鬼，要帶新人。」
做舞台劇冇錢賺眾所周知，但家棟仍覺好玩：「做舞台劇要有火有心嘅人做，唔諗賺大錢或出名，但舞台劇可以refresh自己，台上要好多能量，又冇得NG。」
無綫出身的家棟也有留意台慶頒獎禮，他說：「我貼陳豪攞最佳男主角，因為喜劇難做，但由我講唔公平，因為唔係套套劇睇晒。」林峯爆冷捧走我最喜愛的電視男角色，家棟直言少睇電視，沒看過林峯演出。
恭喜麥長青
提到林峯電眼殺死人，家棟就說：「歌星嘅聽眾可能係小妹妹或女士，見到咁樣梗暈浪，我有都電吓先啦，冇之嘛，不知幾羨慕。歌手要有首食得住嘅情歌先可以拉住聽眾嘅心，同埋啲MV拍到你好爆o架嘛。」對於麥長青奪最佳男配角，家棟恭喜連連：「用咁多年時間浸淫，佢一早要攞，綽綽有餘。」採訪：朱倬誼
攝影：陳慧安