長達兩年嘅梁展文調查終於出報告，八方睇完份報告，感覺係大快人心，唔到政府唔認錯，其他主角死撐只係自暴其醜。
成件事查足兩年，委員會主席李鳳英噚日表現得幾感慨，事關聆訊前要花好長時間睇資料文件，聽完證人供詞後，又要趕住寫報告，車輪戰式開會十分難頂，英姐上年2月開會前睇文件搞到頭昏腦脹，喺立法會內叉錯腳碌落樓梯，盆骨跌到移位，之後住院幾個月，做物理治療大半年先復元，所以做呢份報告真係搵命博咁滯。
李永達申請免役
副主席李永達噚日亦話經此一役，已向黨團申請以後唔加入同類型專責調查委員會，事關多年前佢查過新機場大混亂，當時已經做到癲，今次查梁展文，做到佢幾乎精神崩潰，其中一個原因係新世界純官多軍師，唔只一次出律師信畀調查委員會想「將軍」，議員稍有差池隨時前功盡廢，佢笑言家陣年紀大，唔能夠再承受呢啲壓力，若然日後立法會再成立調查委員會，唔使再預佢加入咁話。