大市衝唔上噚日所講嗰幾個關鍵位，果然就掉頭急挫，恒指一插又落番23000點水平，收市跌335點，報23092。期指跌勢更急，大跌384點，又變番低水，好在跌市成交唔多，只有777億元，同跌幅唔配合，拋售壓力其實唔算大，但短期調整市未完，恒指上周一低位22785支持會再受考驗，唔排除會再創新低。年底前，大市仍會好波動，大上大落，明年則可全面看好。
信佳國際（912）上月底派靚靚成績表，刺激股價大升，由2.30元升到3元水平，跟住在高位整固，昨日最低2.60元，收2.69元，跌6仙。7月中推介信佳，當時股價1.48元，高位計升幅已有一倍。公司前景仲係睇好，加上息口唔錯，有貨在手者可繼續持有，亦可趁調整時收集，等明年收割。
信佳以生產電子產品為主，2011年度（3月年結）上半年營業額5.96億元，升23.4%；股東應佔溢利4053萬元，升61.2%；每股盈利15.1仙，升54.2%；派中期息5仙，升25%。2010年度營業額9.59億元，股東應佔溢利5651萬元。
產品多元降風險
受惠於全球經濟逐步復蘇，市場對信佳大部份產品的需求回升，而集團又能成功精簡營運及控制成本，令盈利大幅上升，純利率由5.2%提升到6.8%。
期內電子產品銷售額達5.64億元，升21.3%，佔集團總銷售額94.7%。電子產品業務包括生產專門電子產品如互動教學產品、自動收費系統、專業音響設備和寵物培訓器材，以及一般消費電子產品等，集團已建立更為均衡的產品組合，以減輕對個別產品的依賴，從而降低風險。
除現有產品的內部增長外，集團亦為日本客戶推出新產品，今年12月可大量生產，有關收入可在下半年度反映，預期2012年度可帶來更大貢獻。
保守估計現年度盈利可達8500萬元（前預測為7000萬元），升50%，每股盈利31.4仙，派息14仙，預測PE8.5倍，息率5.2厘，中線持有可財息兼收。
郭兆誠