花旗股市前晚表現唔錯，不過轉個頭就跌番轉頭，原因係奧巴馬宣佈同共和黨達成協議延長減稅方案，涉及嘅資金可能超過3000億美元，同推出另一次刺激經濟措施冇乜分別，投資者近排最擔心嘅就係通貨膨脹惡化，又QE2，又QE3，家仲繼續減稅，難怪股市即刻掉頭。
港股都唔例外，恒指昨收23092，跌335點，如果23000關失守，就要靠22500頂住。
中鐵C輪15738：中國中鐵（390）噚日收報5.59元，升2.8%。股價喺10月底由6.66元回落，跌至上月底5.35元喘定，近日喺低位整固，噚日5.7元阻力位，雖然未一舉攻破，但係技術走勢同成交都對辦，短線有機上試6元，破位睇6.40元，可以諗吓隻C輪15738。隻輪現價8.4仙，2011年4月28日到期，行使價5元，溢價4.8%，引伸波幅36.9%，槓桿率6.7倍（有效4.8倍），正股升上6.40元，15738睇15仙，正股跌穿5.30元就沽咗隻輪。
俊樺