小業主反抗大地產商不斷起義，荃灣愉景新城一班小業主，早幾晚舉行大會表決成立業主立案法團，請埋民主黨立法會議員李永達到場。雖然有超過1,000位小業主出席，絕大多數支持成立法團，但係負責物業管理嘅發展商香港興業，只係投咗兩票，就K.O.咗班小業主。
小業主代表何先生話，屋苑有3,360戶，噚日即使有千幾戶出嚟投票，都只係得6,583業權份數，但係香港興業擁有屋苑商場，佔8,660業權份數，加埋停車場1,000幾業權份數，已經贏小業主一條街，仲未計香港興業手上嘅第三票，佔3,000幾業權份數嘅公用地方，意味最少要集結2,000幾個小業主出擊，先有機會鬥贏香港興業。阿達呼籲小業主唔好放棄，繼續對抗地產霸權，佢會喺立法會要求討論，幫小業主討公道。