眨吓眼又一年，到底花旗國人眼中，邊個至係今年嘅最佳CEO？財經網站MarketWatch嘅讀者，就選咗福特汽車揸fit人穆拉利（圖）。而今年大熱倒灶嘅蘋果公司掌門人喬布斯，就畀網站編輯推舉為過去10年最掂CEO。
穆拉利有幾把炮？金融海嘯嗰陣，上任冇耐嘅穆拉利當機立斷，抵押資產借咗240億美金，得保福特清白之身；而佢個行家通用汽車就要政府注資打救，GeneralMotor變成GovernmentMotor，英名一鋪盡喪。福特之後越戰越勇，喺美國嘅市場佔有率連升兩年，仲連續五季有錢賺㖭﹗
至於喬布斯，iPhone同iPad嘅出現，令全個地球都充斥住「果粉」（蘋果粉絲），過去10年公司嘅銷售額達到2290億美金（約1.79萬億港紙），市值飆至2850億美金……佢梗係實至名歸啦！