好多影迷對廿幾年前嘅《Tron》仍記憶猶新！作為荷李活首批科幻電影，82年上畫時，佢所表現嘅特技真係令人嘆為觀止！續作《Tron：Legacy》嚟緊23號上畫，電影推出前，遊戲版《Tron：Evolution》搶閘玩先。前文後理、連結兩代電影故事，入戲院前先同大家溫歷史！
記者：許福合
女角聲優演出
Fans們可能會奇怪！既然遊戲同電影在同一個月推出，點解會用兩個名呢？遊戲版嘅《Tron：Evolution》其實將會連結兩代——《Tron》同《Tron：Legacy》劇情；而遊戲主軸，則會依據Legacy電影情節，玩家要與反政府軍聯手，同獨裁軍團決戰，目標就當然要解救Tron世界！玩遊戲時記得留意女角聲音，據講係找來電影女主角OliviaWilde真人聲演，玩完遊戲入場睇戲時，聽吓似唔似！
電單車 速度感十足
如果睇過電影Trailor，會發現遊戲環境同電影版好相似！有啲似星戰風格，再溝濃重嘅電子世界味道。
遊戲玩法以動作為主，要完成各種不同任務。遊戲中跑跑跳跳皆可見到主角靈活嘅身手，而且戰鬥方式亦花樣多變，可以赤手空拳使用格鬥技，亦可使用磁碟嘅攻擊招式；使用時就好似回力標，出招時仲會有光影拖尾，視覺效果相當不俗。
但講到最正，當然係駕駛電影中拖住光尾嘅電單車，速度感十足，好似變咗賽車遊戲一樣！另外，遊戲仲支援網上多人對戰，最多10人組隊參與戰役，令遊戲可玩性更高。
資料室
Tron電影版
1982年的電影，比較多人記得係中文名《電子世界爭霸戰》，主要講主角Kevin與好友發明程式Tron，可以透過內部電腦連線，進入中央系統進行破壞，目的係脫離電子世界嘅控制。廿幾年後的《Tron：Legacy》，主角變成Kevin兒子——Sam，為了救父親，又要在電子世界惡戰，電影將會在12月23日上映。
Profile
主機：PS3、XB360、PC
開發：PropagandaGames
類型：動作
人數：1-2人
