考評局秘書長張永明做咗六年，明年升仙做高級顧問，懸空嘅職位局方早前組成遴選委員會，請咗國際獵頭公司做全球招聘。據講有超過2,500人申請，頭輪揀咗約140人出嚟，然後篩剩十幾人角逐，下星期二考評局開大會，可望一擊即中，搵到真命天子。
秘書長個位要熟悉考試制度，又要去立法會解畫，後年新嘅中學文憑試上場，一返工就要落場，熱身時間好有限，年薪逾200萬，呢份工易唔易做見仁見智。張永明由副秘書長做到秘書長，前後六年，佢笑言最大變化係頭髮少咗。明年1月1日返新崗位之前，佢會先放一個悠長假期。
為推銷開放形象，考評局明年1月7日起一連三日會在中央圖書館搞資訊日，又會請大學做形象意見調查，了解外界對考評局睇法。考公開試一生人總有一次，畀持份者早啲認識多啲了解點都係好事。