家族式大型企業，規模仲大到上市嗰隻，絕對係需要一個開國謀臣幫手打江山。香港老牌地產商新世界發展（017）嘅掌舵人─鄭裕彤（彤叔），咁多年東征西討，全靠背後有個「殿堂級」嘅謀臣梁志堅（堅叔）幫忙。唔好搞錯，呢個唔係奸人堅，而係喺地產界打滾40幾年嘅老江湖，佢經驗老到，由新世界未上市，做到家集團市值近600億，可謂功不可沒！不過呢位開國元老，噚日就宣佈明年退休嘞！
作風硬朗紅灣一役經典
講到堅叔，人如其名，堅到爆！佢70年代已經同彤叔打工，幫彤叔手建立新世界，雖然40年嘅青春就咁畀晒彤叔，但係睇住新世界一日一日長大，一定好有成就感同歸屬感。至於戰績喇喎，新世界搞地產起家，堅叔既然係彤叔頭馬，又係公司參謀大臣，所有同土地有關嘅事，無論收購地皮、併購舊樓、官地拍賣、買賣現成物業，統統都關佢事。聽聞89年落成嘅荃灣海濱花園塊地皮，就係當年堅叔親自飛去美國同油公司加德士傾返嚟嘅。而新世界唔少品牌豪宅，好似西半山學士臺、中半山嘉富麗苑、前身係學校嘅俊傑花園等，都係佢一手打理。近年最經典嘅，就非04年新世界有份參建嘅紅磡紅灣半島（現稱海濱南岸）重建風波莫屬。當年，堅叔一句話「廁所（紅灣半島）連大肚婆都入唔到去」一度成為城中佳話。近年政府諸多留難地產商，多多規條要地產商遵守，堅叔不時代表地產界出頭，狠批政府各樣花招，作風硬朗。
噚日華華去新世界總部樓下等堅叔，佢話：「退休之後仍然係公司顧問，只係日常嘅工作唔跟，假期唔會返工。不過，一個星期仍然會返5至6日工，我個人喜歡返工。」佢仲話：「喺新世界已經做咗40年，咁啱今年新世界又係40周年，我都覺得係時候（退休），其實公司法定退休年齡係70歲，我已經超過咗年幾，而公司（業務）已經上軌道，亦都有好多人跟（工作），所以選擇退休。」
「家選擇退休冇乜特別嘢，我已經超過70歲，公司畀咗好多機會我，家係時候畀返啲機會後輩，等後輩上，而事實上公司工作量亦都好大，但係我仍然會每日返工，直至工作完全有人接手，arrange好啲嘢先告別，特別係jointventure嘅嘢會先交代清楚。」
至於顧問無任期，佢話：「我鍾意做到幾時就幾時。」佢仲話有同老闆傾過，彤叔話：「我都80幾歲，都未退休。」不過佢都尊重我嘅選擇。」而地產建設商會就因為就快遴選，「到時再睇吓大家意向，商會嗰邊唔成問題。」
李華華
mailto:[email protected]
