張愛玲說成名要趁早，像大埔恩主教書院的軒哥，借追女仔之名慷慨解囊，校內豪派四萬元和八部「埃瘋」，現身港聞版，紅過非凡哥！你暗忖，過萬元零用誇唔誇？唔誇，事實現今一般中學生零用都至少過千，何況富貴幫長存學界，揹名牌書包搭的士返學毫不出奇，只是近年過份吹捧物質主義，沒錢的人也要「豪起來」。
記者：蔡俊業
攝影：陳陶鈞、林栢鈞
模特兒：Lowell、Debby@PureModels
鳴謝：GregoryPacks由re:ech.o提供
返五日學 換3次名袋
就讀中七理科的陳智樂（Lego）想起那次買Gregory袋的經歷便苦笑，「中四、中五，一班內至少有5、6個學生用Gregory！我以為這個袋好平，諗住攞幾百蚊去買，點知原來咁貴！」他在粉嶺讀書，每月父母畀零用約千多元，「平均一星期用$300，用得最多係食，佔七至八成，其次係車費同飲嘢消遣，如果要出街就多花一、二百，亦有些是自己以前儲下來。」他曾做過暑期工，賺回來的錢買了一隻$1,200的G-Shock手錶，應是他全身最昂貴的物品。「我好少買名牌！但有個同學屋企幾有錢，一星期返5日學可換兩、三次袋，又agnèsb.又Nike！」
他那就讀中五的女同學就更厲害，「一個人就已經有3至4個Gregory袋，一個出街一個學油畫一個就返學用。之前還說買錯了一個銀色，於是就另買一個幾百元的多間隔袋，沒多久又買了個Masterpiece，要$2,300！」他說對方生於富裕家庭，Lego說她身邊同學的消費模式都是如此，難免會互相影響，「佢哋至少每人要有一個Gregory袋先。另外，我食糖最多係食能得利，送生日禮物畀同學只係得力素糖，但她就要食印有小熊維尼的糖，朋友開心無論幾貴都要買，畀我感覺是用錢去維繫友誼！」Lego說很多家長因為自己沒時間陪伴子女，才以金錢安撫，加上朋輩影響，這種根深柢固的價值觀很難改變，「如果唔係就唔會有援交，亦唔會有大學生碌爆信用卡跳樓啦！」
三成零用 與女友共享
軒哥在學校派錢出現在A叠，連同社會越趨濃烈的消費氛圍和拜金主義，Lego認為這種風氣很有問題，亦漠視自身性格等素質，他的同班同學馬俊俙則有另一番體會。他跟他弟弟一樣，每個月父母都會給$1,500零用，當中的$700至$800花在用膳上，其餘三成就要跟女朋友共享。「因為她的零用錢很少，所以很多時候都會代她付錢。」不要誤會是坊間流傳的富豪包養式「貼女」行為，只是對方着實太窮，一星期只有$60零用，另加每日返學有$20可吃飯。「我覺得佢真係食唔到嘢！但佢阿媽又長時間不在家，所以午餐晚飯都在外面食，食杯麪或者公仔麪。」眼見越來越多同學用名牌，他感嘆：「以學生來說我覺得是辛苦，因為對比其他有錢學生，你真係會有比較。」
10個學生4個用Gregory
10年後的今天，AirJordan已成為上一代的男生追憶，如今一輩出街或上PE堂，買對NikeAirMax已是有米象徵，過千元的日本版NewBalance更可登上「富鞋榜首」，都是很娘那句：每個年代總有經典事物。蘇真真說，當年潮同學愛揹MandarinaDuck，現在街上見得最多是Gregory，否則沒資格叫潮。來自美國的Gregory本身是行山袋，re:ech.o旺角分店店務主管馮駿業（Anthony）指，售價10年前才不過數百元，但後來由日本人諗計變身潮牌，布料花款越出越多，便開始矚目學界，「可以話係中學版的LV，現在不及兩、三年前厲害，當時真係好多學生搶，依我所見，區內10個學生4個用，呢個比例好誇張。」雖然每個正價約$1,300至$1,800，但仍無損叫座力，「今年開學，一日內就賣出10個！有時學生哥想買又唔夠錢，就會立即問同學籌旗！」
軒哥7萬10年變20萬
我們問理財策劃師林昶恆，如果軒哥將祖母給他的4萬元，連同買8部iPhone價錢（約3萬元），合共7萬元，乖乖地拿去作增長或回報率較穩健的投資，按年回報10%（購買滙豐、建行或亞洲股票基金），10年後即軒哥24歲時，可累積幾多財富？林昶恆計算後指，其總資產可增至20萬，嘩，可足夠修讀一個碩士學位，亦可以繼續投資多幾年變成首期，分分鐘上樓快過80後，真係有數得計！
學生回應軒哥
理大護理系一年級黃同學：「可能軒哥無正確的使錢觀念，佢咁做只屬個別事件！」
理大會計系三年級梁同學：「我覺得軒哥錢多到唔知點用，亦都唔知咩叫尊重人！」
追錢一族
蘇真真：思想教育慳得就慳
軒哥在校內派錢的新聞，令我回想當年每星期老竇只會畀$200零用，已經是中學時期的最高水平！跟我同為80後、兩年前憑《香港潮語學習字卡》打響名堂的蘇真真，生於中產家庭，家住海怡半島，照計蘇生蘇太畀零用錢都鬆手點吧?!「每日得三、四十蚊，只夠食飯和搭車，與其他同學相比其實不是太多，用剩錢可以儲起來買漫畫或者去打機。」他說蘇家上下向來慳錢至上，所以蘇真真從小都接受「慳得就慳」的思想教育，「這個概念已經在我腦海植根，無論去超市抑或買衫，只會減價才買，見無減價就唔睇！」
無AirJordan無正選做
日子有功，蘇同學已經習慣了這種慳家模式，九十年代就讀皇仁，蘇真真直言當時也有同學很有錢，這班富貴幫的零用錢是他的2倍（約$1,600），名牌裝身，好不稀奇，「最多人捨得花錢去買AirJordan波鞋，好似Jordan11、12同13，袋就興地圖袋（AlvieroMartini）、MandarinaDuck、Bold袋或者係LeSportsac，鞋就一定買Dr.Martens。」嘩，全部都要過千元才可埋單的富貴品牌，每星期只有$200的蘇真真點會有錢買？但做人難免有虛榮心，於是就在家附近的皮鞋公司買了一對「Dr.Martens」回家，「見人有，又差唔多款，點知原來係假嘢，因為其他人說Dr.Martens真貨的鞋底是有十字的，但我買的那對沒有。」這種表現，或許是曾受富貴同學白眼的條件反射，話說當年男同學對AirJordan奉為頂級球鞋，沒想到竟然變成當年皇仁籃球場的入場券，「如果你打籃球不穿Jordan或有Air的話，人家就會覺得你唔識打籃球，我記得當時着一對很普通的跑鞋打班際，已經俾人笑，仲唔俾我做正選！」
蘇真真
九十年代名牌
傳媒鼓吹金錢掛帥
軒哥派錢，學校隨後表示已即時禁止，但離開學校後又是否禁得住？蘇真真說這一代的學生很不同，覺得金錢最重要，「莫說派錢，我在小學教書時就聽過有學生走去別人屋企偷錢！」而校園逐漸變成名牌比拼擂台，「小學生都話要出iPhone，說是阿媽唔用畀佢用；我現在於土瓜灣區教書，區內都已經不是很有錢那種，但都會見到有幾個女仔揹Gucci袋返學，她們用來裝PE校服的紙袋都是LV或者其他名牌。直資學校就鬥得更緊要，因為整個社會都係咁！」他認為傳媒絕對是推動這股風氣的最大動力，每日24小時財經新聞台不斷分析買甚麼股票賺錢，資訊氾濫，翻開報章雜誌，來來去去，不是最新出品的潮流衣飾，就是某女星以身材和事業線賺更多的錢，「梁洛施為李澤楷生仔竟然可以上到報紙頭版，咁會出現一種社會效應，學生見到，自然覺得其他事情相比之下都不是太重要，就算是家長亦經常灌輸一種價值觀，『要讀好書搵好多錢』，香港九成父母反對從事文化及藝術工作，因賺錢唔多，而社會認為錢能帶來成就感，成就就是來自金錢，有老師更講笑話：『畀部iPhone我都會叫佢軒哥！』呢個係成個社會嘅問題！」
Q&A 小四開始有零用
Q1 現今一代跟九十年代的中學生揀背囊有甚麼不同？
Anthony 九十年代都有學生用過千元的名牌袋作書包，例如AlvieroMartini及MandarinaDuck等，但不及現今普遍。
Q2 為何Gregory背囊售過千元仍會如此搶手？
Anthony 產品在美國生產，布料顏色及花款多，有花紋設計款色流通數目少，且每家店獲分配的款色不同，造成市場效應，要競爭才可買到，逐漸成為中學生的身份象徵。
Q3 是甚麼原因催使學生高消費現象？
蘇真真 商場及名店越開越多，且時代進步，學生容易得到消費資訊，難免會令受眾很想擁有。
Q4 父母甚麼時候應開始給子女零用錢？
林昶恆 可以考慮小四開始，金額沒準則，應限制不超過5元一天，但中學生因支出多，最基本是計算交通費用及足夠應付每日午飯開支。
Q5 父母因工作繁忙以錢作為補償，給子女過多零用，有何不妥？
林昶恆 如零用錢超過買零食的需要，餘錢可能不當地使用，因而建立錯誤價值觀，作為父母應讓孩子知道錢以外，與人建立良好人際關係更重要。