中台關係解凍之後，今年唔少內地官員積極出訪台灣。台灣前經濟部部長、現台灣外貿協會董事長王志剛，噚日喺香港亞洲論壇上就爆料，話今年4月曾經帶上海市市長韓正（圖），去台灣嘅農村郊遊，向韓市長推介台灣嘅農作物。點知班台灣農民一見到官仔骨骨嘅韓正就嚇親，因為佢哋以為共產黨高官個款，應該係薯頭薯腦、額頭貼藥膏膠布喎！
會上有台商好關心，後年中共大執位，換上習近平做一哥，會有乜改變；台上另一嘉賓光大控股執行董事陳爽就咁分析，佢話中國早期歷史都係多災多難，無論係中國人民同共產黨都從中反思，要確保今後嘅政治體制平穩發展。
而且小平嘅改革令廣大人民得益，中國嘅政治體制亦唔易有改變。