啱啱約滿Sony嘅鄭伊健，噚日喺尖沙嘴為佢明年三月嘅紅館個唱舉行記招。伊健話家少咗掣肘，終於可以上無綫，令佢嘅個唱多咗宣傳嘅地方。
伊健明年3月5、6號會喺紅館舉行「鄭伊健BeautifulDay2011演唱會」，記招上主辦商東亞娛樂老闆林建岳都有出席。記招現場嘅佈置猶如婚禮一樣，伊健經理人林珊珊話係特別為伊健設計：「我都係成人之美，佢成日喺訪問度話想結婚，我咪畀個機會佢試吓，等佢諗清楚囉！本身仲想安排個小新娘畀佢，但怕佢get唔到。」
想自資出碟
伊健同唱片公司Sony啱啱約滿，講到自己去向，伊健就話：「聖誕前會有新歌，都想出碟，家就諗緊自資。」問到佢會同Sony續約定係加盟同佢合作無間嘅東亞？伊健坦白咁話：「如果四大唱片同無綫嘅問題搞好咗，都會有再合作嘅機會，不過家都未知，而東亞係有同我接洽過。」
講到記招會場似婚宴，伊健就即時唱反調：「我覺得似春茗多啲。」記者笑伊健係預演同蒙嘉慧嘅婚禮，佢即時話唔使預演，仲話喺自己班朋友中唔算係最遲結婚。
預備騷肌肉
上次個唱冇機會騷岩石胸嘅伊健話，今次特登同服裝設計師朱祖兒講，可以騷騷自己個body：「今次應該有機會，我都有同佢講，話晒練得咁辛苦，都想畀大家睇吓！」