諾貝爾和平獎頒發大日子將至，北京政府如臨大敵，觀禮團都積極備戰衣進軍挪威奧斯陸。幾個泛民主派議員今晚搭夜機出發，啟程前要張羅觀禮戰衣，因為大會對觀禮嘉賓衣飾有規定，要着俗稱「踢死兔」嘅禮服，唔想咁大路，着民族服裝都得，何俊仁同李卓人選擇後者，決定着中山裝登「陸」，卿姐就簡簡單單一襲深色長裙出場。
中山裝三至四千元
由於呢次係首次有中國人攞和平獎，李卓人話佢同何俊仁一致認為，應該穿着有中國特色服裝觀禮，所以唔着「踢死兔」而穿中山裝，上星期幫襯土炮名牌觀奇洋服度身訂做。據講佢哋要求忠於原著，即係跟足孫中山設計訂做，選擇深灰色。同行觀禮、一齊訂做中山裝嘅中國維權律師關注組執行秘書潘嘉偉話，款式類似劉德華唱《中國人》着嗰件。
上星期五去觀奇度身後，話咁快幾日就起貨，三人噚日去旺角分店試身。兩個泛民議員着起中山裝，忽然勁有幹部同志feel，觀禮時應該十分搶鏡。在觀奇度身訂做一套中山裝連企領恤衫豐儉由人，何俊仁同潘嘉偉嗰套約3,000蚊，李卓人比較高要求，揀靚啲料，埋單4,000幾蚊。觀奇喺香港可以話係家喻戶曉品牌，其中一個原因係TVB劇集男演員西裝幾乎由觀奇包辦，今次殺出維港進軍挪威，都算香港之光。
去示威要着得輕便
今晚一齊出發嘅卿姐，梗係唔會着中山裝，八方聽聞卿姐獲邀後，都為件禮服而煩惱。卿姐平日多數着套裝，八方一時間想像唔到佢着晚禮服會係點樣，有人建議卿姐着旗袍上陣，襯番中山裝。八方噚日問佢預備咗甚麼戰衣，原來卿姐已經打點好晒，「會着一條半截長裙，上身着件外套，簡簡單單，大方得體就得，唔知係唔係晚禮服喎。」卿姐又話其實着晚禮服唔係幾方便，「我哋要喺場外示威，有好多活動，套衫都係簡單啲比較好」。
mailto:[email protected]