隔晚花旗股市窄幅上落，道指收市微跌，QE3概念係好係淡，睇你點睇，不過資源價格同噚日嘅亞洲股市就好似幾受落，港股彈升190點，雖然仲未升破20日線，但睇嚟破關嘅條件已經接近成熟。
各個股市造好，其實唔一定關QE3事，都係一個藉口，年結就快到，較大可能係借消息炒上，恒指年結前有機再試24500關。盎斯金價升破1400美元之後，走勢越嚟越靚，快破1500美元。
紫金C輪25714：紫金礦業（2899）噚日收報7.59元，升4.1%，股價之前升過上8.30元，不過成交冇大增股價又跌返轉頭，喺條50日線整固咗幾個禮拜，噚日終於見異動，大成交突破20日線，相信升破8元關之後會上試8.30至8.60元，可以諗吓隻C輪25714，隻輪現價10.9仙，2011年6月10日到期，行使價7.28元，溢價10.3%，引伸波幅46.4%，槓桿率6.9倍（有效4.2倍）。正股升上8.60元，25714睇17.8仙，正股跌穿7.20元就沽咗隻輪。
俊樺