華叔最想踏足嘅中國名勝中，黃山係其中之一，估唔到同華叔一樣做過基本法草委嘅李柱銘（馬丁）都同樣視黃山為回鄉首選旅遊熱點。馬丁接受港台節目《中國點點點》訪問時話，上黃山雖然好辛苦，自己卻一啲都唔怕，但當然唔會為咗回鄉夢而放棄民主夢。
爸爸嫌錢「污糟」
雖然不時被人批評為「漢奸」，馬丁一啲都唔嬲，反稱成個人都舒服晒，因為如果連漢奸都鬧埋，都冇乜嘢衰得過呢個稱號啦！佢仲話呢個稱號反映佢外訪時所謂「唱衰」講嘅嘢，一定踩中內地痛處，否則親中嘍囉唔會咁緊張護主。馬丁為人一向樂觀，佢話當全世界都步向民主路，唔通中國仲行包尾？所以相信中國遲早會實現民主。
馬丁鍾意打麻雀人所皆知，佢噚日喺電台節目主動爆料，話阿媽當年要生佢時正在攻打四方城，忽然作動先至離開麻雀枱去生仔。馬丁話現時雀術唔錯，人生有更多樂趣，真係要多得有此優良胎教，至於佢爸爸為人清廉，成日嫌錢「污糟」，叮囑佢同家姐細佬咪掂咁多。