揸車扭彎　大足球抽射！

鬥完六站的尚酷盃（SciroccoCup），終於嚟到肇慶作最後一戰。未睇賽車前，VW已安排一場揸車踢足球比賽，憑住Scirocco低重心好入彎的特性，扭完一大輪雪糕筒，再踩油將巨型足球抽射入網，令人體會到Scirocco嘅好彎同勁度呀！

記者、攝影：徐影龍

巨型足球　易睇難射

福士已經第二年搞SciroccoCup，更揀咗肇慶新建成嘅廣東國際賽車場，作為最終冠軍爭奪之地。英雄地肇慶國際賽車場，雖然面積比珠海賽車場略細，勝在夠新淨同配備較齊備，最重要係保安工作認真得多。
一到埗，廠方先安排中港傳媒玩遊戲熱身，一堆以球為主題嘅遊戲，全都以主角Scirocco做工具，如停車射籃球、倒車拮爆氣球等，但論最好玩嘅，首推揸車射龍門！好玩之處在於射波前，先左右兜圈扭過一堆雪糕筒，本來對於低矮重心同強大馬力嘅Scirocco嚟講，實屬小菜一碟，不過有啲祖國傳媒唔慣Scirocco的強大馬力，急開急停又或揸得慢，導致埋門一腳頂射時唔夠力，要犯晒規「推」波入龍門！其實就算快都無用，有啲人揸到響晒胎咁扭彎，去到龍門口已經掟到暈陀陀，車身唔夠直打晒飛機，整個遊戲看似簡單，玩落又幾刺激過癮呢！

■2011盃賽將再度衝出中國，加入日本及新加坡站，令人期待。

■Scirocco偏向低矮，高急入彎更為穩定，令彎位戰況更刺激。

街車規格　賽車表現

輕鬆完一輪，開始SciroccoCup最後一站的冠軍爭奪戰，進入大戰凝重氣氛。呢個盃賽嘅好玩地方，就係戰車全用同一規格，以街車版Scirocco做藍本，胎軨、防滾架、桶椅等全部一視同仁，絕對係純技術較量，唔會出現「輸咗賴架車」嘅情況。
賽道唔算複雜，起步點一條大直路，讓戰車盡情發力，經過觀眾看台，每一架都發出震天巨響引擎聲，速度快到難以影相，你會驚覺Scirocco只得2,000cc及DSG+/-波箱，快起上嚟都幾得人驚。彎位集中喺東西兩邊，難度唔算低，終極戰就有兩架車失控鏟出草地。總數決鬥17個圈，去到中期差不多分成頭中尾三批，差不多算勝負已定。最後廣東站冠軍由港人車手KennyLo以25分39.067秒奪得，而七大分站總冠軍，則由意大利車手AndreaReggiani以總成績130分摘冠。