巴塞隆拿70年老店　潮買麻布鞋

無得shopping的旅程，我稱之為未圓滿，這個思想其實是有點錯，但無辦法，天生性格係咁……故此，出名只得火腿買的巴塞隆拿，出發前心裏總是囉囉攣，心生縮沙念頭。但皇天是不負shopping人，單是做收買佬都買死我！

記者、攝影︰吳美美
鳴謝︰卡塔爾航空、西班牙旅遊局

時裝友吹捧手做鞋

報告！收穫豐富！
嘻嘻！通常意外比預知收穫來得更盡興，而且，要買得心頭好最好耍點手段。
Espadrille，雅虎字典的解釋是有麻繩底及帆布面之平底凉鞋。還記得前陣子各大時裝品牌都吹捧這類布鞋，時裝友model一人一對着上腳，我就反璞歸真尋根源。
Espadrille源自西班牙與法國邊界的Pyrenees（庇里牛斯山），因而在巴塞的小巷內，我能找到源自西班牙內戰之後四十年代出現的「LaManualAlpargatera」，一間售賣全人手做的傳統Espadrille，甚至憑此手作成市內地標。
推門後，眼球是自動地向左面直排的Espadrille掃射，起碼有兩個人高，收納了數不清的顏色，由姣婆紫至軍佬綠都有。
踩場當日，因天氣關係，到訪人士不多，只見一男一女密密做鞋，另一女士招呼客人，我就當然慢慢睇，拎鞋子上手，摸落紮實，用上植物纖維如大麻、黃麻，而棉花與亞麻就是製鞋面主要物料，試上腳走了兩步，比「Con士」舒服得多囉！在此，提醒大家，若與阿姐搞好關係有偈傾，隨時有oneandonlyone的正貨拎出嚟，就好似我腳上的一對米白色低筒款！Yeah！
另一方面，這裏對木製品都有心得，有顧客進來要求買煙斗，睇真點，連枴杖都有，原來，老店暗地裏多元化了。

■已成我獨家收藏！米白色低筒款約$340

■男裝深藍色低筒款約$280

■不是全膠底，令散熱能力更強。

■最平的Espadrille款式，軍佬綠約$80。

■我稱之為「木做試鞋器」，唔使彎晒腰咁辛苦。

■你哋密密做，我哋密密買。

■維也納女子們好頭痕，因為買唔到想要的顏色。

A.LaManualAlpargatera

地址︰Carrerd'Avinyo7,Barcelona

鐵達尼都嚟借衫　無敵靚喱士裙

《Myheartwillgoon》唱了十幾年，我才首度拜訪L'Arcadel'Avia好像有點遲，原因？很多電影美指或導演都會來到選戲中服，《鐵達尼號》是之一，《情迷巴塞隆拿》更來到取景！其實近門口位置已經擺了海報出來宣示主權，但請移玉步到內堂，裏面的vintage喱士及長裙，特別在它們擁有的米黃色，花紋真係無敵地靚，是女士們的dreamdress。而店主女兒Nina.B就介紹了自己仿造拿破崙時期的婚紗款，暫時只用針別住，因為可隨時按客人喜好更改。咁都幾好喎，況且裙款都是一千元歐元附近，價格合理到不得了。
來到店舖中間位置，有其餘的vintage衣飾，件件精絕，但掛牆的人手繡日式Kimono及Nina所戴的fur帽都是當中bestpicks。

■Nina.B手中的婚紗只是拼湊出來，隨時可以變款的。

■《鐵達尼號》都嚟借衫，win晒啦！

■西班牙皇后結婚時都係用類似的頭紗款，想學佢，請到此。

■呢件Kimono同批喱士有得揮。約$8,500

■Nina.B頭上的vintage帽是我幫她戴的，好襯佢。約$400

■要走到店的盡頭先會搵到全店之寶——喱士！

B.L'Arcadel'Avia

地址︰BanysNous20,Barcelona

四代帽子店

我愛帽，特別愛到歐洲城市尋尋覓覓，Parma、Milan等，巴塞最近亦列入list中。1924年開始生意，現今傳至第四代的SombrereriaObach，門外將帽子放滿一櫥窗，店內帽子放入木櫃內是一派老氣象，可惜帽子不是handmade，否則矜貴度增加時我更愛。基本款式要乜有乜，畫家帽、紳士帽、禮帽等，店內角落有部小機器很有趣，店主將之放在導遊頭上，查實是老派人做帽時用來測頭圍的，但我覺得似古時拷問犯人的刑具多啲。