八方老闆、壹傳媒集團主席黎智英除咗進軍台灣電視業務同埋搞壹傳媒動畫公司之外，房地產投資都一樣咁進取。據台灣《蘋果日報》報道，黎智英最近斥資20億台幣（約5.15億港元），大手掃入台北市中心大安區豪宅「頂高麗景」九個單位，每伙面積1,300至逾1,900呎，呎價平均36,000元港紙，係簽定ECFA後最大筆港資入市紀錄。
料在台持25億房地產
黎智英掃入嘅「頂高麗景」，樓高15層，一層一戶，扣除複式單位同一樓，僅12伙公開發售，黎智英一次過買入四分三數量單位，莫講話台灣地產界，八方身在香港都覺得震撼。黎智英在香港罕有投資地產，在台灣重鎚出擊，梗係睇準升值潛力。呢個盤啲單位露台對正號稱「台北市肺」嘅大安森林公園，2012年有新鐵路站啟用，加上兩岸經濟合作架構協議（ECFA）簽定，內地富豪遲早去台灣投資，因此當地經紀都指黎智英投資眼光獨到。
黎智英01年進軍台灣後，多次在台北市內湖區買地，現持有約8萬呎地皮，近年升值以倍計，賬面賺咗5億港紙以上，連同陽明山別墅同其他物業，估計持有房地產市值約25億港元。