這邊廂80後想上車，那邊廂落咗車嘅議員，一樣想東山再起上車重返議會。風雨飄搖嘅自由黨要靠田北俊、周梁淑怡兩個元老救亡，兩人唔係掛個名指指點點，真係落手落腳介入黨務；黨內人士形容，田少同周太已經開始熱身，為後年可能再次直選做準備。
對地區工作有新體會
周太噚日代替退黨嘅田北辰，出席逢周一召開嘅黨內地區事務小組會議，而田少上星期拍板，月內重整新界東支部，籌備在將軍澳、大埔搵地舖開設地區支部辦事處，以便佢日後落去做地區工作，再次接觸基層市民。
新東係田少老巢，在此東山再起合情合理，據講田少今次好認真，承諾自由黨會每月畀幾萬元租地方、請職員做地區工作。有黨員同八方講，田少嘗過落選滋味，家對做地區工作似乎有新體會，「佢覺得做地區工作，唔係請街坊飲飲食食、影印咁簡單」。不過田少暫未有具體工作指示，如何做有自由黨特色嘅地區工作，八方都好想知道。
見到黨領導人真金白銀搞地區工作，八方收到風，有黨員認為勿失良機，向田少、周太獻計開拓地區服務，認為最好為有意出選明年區選者，在擬出選嘅選區內租個單位做「宿舍」入住，退而求其次，租個蚊型舖做街坊服務處亦可，由黨總部資助三分一至一半租金。
獻計者認為在選區「落釘」，係最能夠緊貼民情方法，瞓身全天候人盯人一年半載，仲唔surewin！可惜，自由黨高層唔buy呢條絕世好橋，否則大家真係要認真考慮入黨，表態出選山頂、南區、中環等地，進駐豪宅，服務居民。
高層或試挽留方國珊
其實獻計者應該唔係幾熟悉田少作風，否則唔會咁講。家陣田少親自領軍，自由黨新東支部主席方國珊隨即請辭，黨內消息稱高層或會嘗試挽留，皆因現時正值黨內用人之際，應該團結大多數人穩定軍心，況且田少、周太是否復出，明年自由黨區選成績絕對係重大考慮因素，因此方國珊舉動令人費解，認為佢唔使意氣用事，「選埋區議會先啦」。
mailto:[email protected]