社民連今年都算多風雨，年初搞公投四面受敵，之後因為與泛民協調選舉問題、路線之爭而內訌、分裂，明年該黨可能有新氣象，因為黨總部會搬遷，由長沙灣6,000呎大單位，搬到大角嘴1,300呎小地方。
社民連副主席吳文遠同八方講，物色新黨總部多時，月初正式簽約，新總部位於大角嘴，面積雖然細好多，不過應該夠用，好處係十分接近旺角，日後在西洋菜街行人專區開壇擺檔，「搭的士都唔使跳錶」。新總部呎租約10蚊，吳文遠話合理，因為有新裝修。
社民連之前籌款想自置黨總部，據講已有一筆首期，但一直未睇啱心水單位，而且上半年樓市升得急，佢哋唔想高追入市，現在繼續租地方，可以慢慢睇樓。