網上噚日突然瘋傳金庸病逝，消息最先喺微博發放，內容話生於1924年3月22日嘅金庸，因「中腦炎合併胼胝積水」，噚晚7點喺「香港尖沙嘴聖瑪利亞醫院」去世。其實明眼人一睇，就知消息流流哋。第一，金庸應該係生於2月6日﹔其次，「中腦炎合併胼胝積水」呢種疾患聞所未聞。最後，香港亦都冇一間聖瑪利亞醫院，瑪利亞書院就有一間。
網友好快戳破咗謠言，中通社同鳳凰網亦有報道事件，引述由金庸創辦嘅《明報》發表澄清，指出金庸嘅死訊係謠傳。金庸上星期五先出席完樹仁大學嘅榮譽博士頒授典禮，雖然行動遲緩咗啲，但係精神尚好。
謠言流傳一大輪後，微博始作俑者主動澄清，佢話「因本人飯後失察，誤信歹人謠言，以為金庸先生真的仙逝……由此給微博友造成困擾，我謹此致歉。給金庸先生名譽造成損失，我鄭重謝罪。」