單身多年的舒淇，雖然常嘆因工作太忙而無暇結識異性，但昨日她卻自爆今年佳節將有不少男伴陪同度過，屆時將會過一個熱辣辣的聖誕！
舒淇、陳冠希（Edison）及陳寶珠昨於海港城出席香港血癌基金會活動，活動後即要趕赴機場到泰國拍廣告的舒淇坦言，今年聖誕將獲不少男伴陪同度過，故不愁寂寞：「原本想留喺紐約過白色聖誕，但因為要宣傳《非誠勿擾2》，所以惟有去熱啲嘅地方，會同成班朋友喺泰國過，當中都有男性朋友。」
唔羨慕大S
記者問舒淇跟那些男友人可有發展機會？她笑謂：「個個都有可能發展，亦可能冇，緣份唔係話嚟就嚟，但都可以一下子就嚟！」舒淇直言沒時間拍拖：「真係冇時間，下個月喺邊都唔知，連發展都冇時間。家單身幾好，都幾自由。」問舒淇如果選圈中人拍拖是否較易？她說：「唔關事，係我好難喺一個地方停留得耐，今年我喺香港嘅時間加埋都冇一個月，好難識到人！」再問舒淇可會羨慕徐熙媛（大S）閃電結婚？她即謂：「係好浪漫，但可能唔係好啱我，實在太快。我唔會閃電結婚，我要慢慢了解吓，橫掂都等咗咁耐啦。」
本月底出新碟的Edison表示，聖誕期間除了必要的工作，其餘時間都會陪家人：「好難得可以一家人喺晒度，24號會陪女友同屋企人，26號我公司有party，因為好想多謝一直以嚟幫我嘅公司同事同朋友。」
開心最重要
問Edison是否比以前更顧家？他說：「其實三年前嘅三年已經係，家個人更加定啲，以前覺得重要嘅，家都調轉晒，家覺得開心快樂最重要。」談到結婚，Edison說：「女友啱啱出嚟做嘢，我又要努力工作追番之前嗰幾年，家未知。同埋結婚係咪一定好？好多人結完都會離，我只可以講家好愛佢，好想同佢forever！」
同場的寶珠姐因食了五隻大閘蟹而病倒，她揚言不會催兒子楊天經跟女友拉埋天窗。
採訪：譚倩宜
攝影：黃偉雄
