宇宙最強亦有乖乖聽命嘅時候，喺3D-IMAX電影《大鬧天宮》中飾演齊天大聖嘅甄子丹，喺戲裏面機靈百變，不過要變身美猴王就要乖乖坐喺化妝間六粒鐘，令佢苦不堪言。
化妝班底勁
《大》片已經喺北京懷柔片場開始拍攝工作，日前一班內地記者就直擊甄子丹整個變身過程。當時喺甄子丹身旁圍繞住幾個外籍特技化妝師，據知呢班化妝班底，就幫過《戰狼300》做特效，來頭認真勁。
首先化妝師喺甄子丹塊面貼上頭髮，再加上頭套同埋補妝，跟住孫悟空就現身。甄子丹之後仲對住塊鏡左睇右睇，似乎非常滿意。
阿Sa搞亂檔
甄子丹化妝期間，仲吸引到喺隔籬拍緊電影《白蛇》嘅蔡卓妍（阿Sa）走過嚟參觀一番。阿Sa不單止睇，仲要用手撥甄子丹嘅髮型兼問長問短，搞到化咗幾粒鐘妝、已經好辛苦嘅甄子丹都忍唔住大笑。
對於《大》片各主角嘅造型咁早就曝光，甄子丹方面嘅發言人張小姐就話唔會擔心，佢話：「其實正式個妝真係要化嘅話，就絕對唔止六粒鐘，呢個只係試妝，仲未係最後嘅造型，而且為咗套戲，辛苦啲都值得嘅。」