【本報訊】在花園街三級大火中，有商販看着自己攤檔被波及燒毀，全部貨物燒成灰燼，傷心落淚；有居民遭大火圍困兩個多小時，終於獲救，開心不已。
檔主埋怨消防射水遲
花園街販商協會副主席朱潔嫻亦是火警的受害者，她在花園街222號旁邊的攤檔賣鞋，「我企喺度睇咗半個鐘頭，佢燒咗半個鐘頭都唔見消防嚟射水！」她埋怨消防救火太遲，令其鞋檔付諸一炬，損失貨物及重建費約10萬元。
住在起火現場攤檔對上單位一樓的馮先生則表示，他在睡夢中被窗外傳來連串啪啪聲響驚醒，探頭外望赫見樓下攤檔起火。馮先生尚有時間穿好衣服才落樓逃生，他說：「落到街開頭見到一邊着火，跟住大風將火屎吹到另一邊，跟住兩邊攤檔都着火。」
起火初時，有大廈低層住客從屋內拖喉向街外射水企圖阻止火勢逼近，其他居民見狀即高聲呼叫：「唔好淋啦，快啲走呀……」
此外，其中一家六口及其愛犬被濃煙困在家中，女戶主曾多次致電999求助，但良久都沒有人來救，「我哋喺上面求救好多次，都安排唔到人手上嚟，我哋一家人保持冷靜，不斷祈禱……好開心最後安全冇事，但已經係起火兩個鐘頭之後啦！」