今年政府多次出手打壓樓市都被指冇料到，上月中終於的起心肝，突然掹出兩隻勁辣「指天椒（招）」，狂插炒家，即刻「辣」謝咗樓市成交。經過兩星期消化，利嘉閣噚日出份新聞稿（圖），都算至激至夠薑，話家搵晒成個市，想搵個炒家都難。炒家絕迹，用家可以安心入市咁話。
佢仲話已見到用家同長線投資者開始慢慢入番市，氣氛都好咗少少，啱啱呢個星期佢哋統計嘅50個二手屋苑，成交都較政府出招後嗰個星期多番近五成，但同出招前一個星期仲差三成半。
利仔董事陳大偉就話，市況偏弱，但係大家對新招已經冇咁驚，炒家又走咗，家見到樓價都好硬淨，用家都會較安心入市。總之一句係要買樓啦。