老友K回美之前，力邀左丁山去三藩市見吓朋友，仲話帶左丁山遊NapaValley，嘆加州紅酒。起初心郁郁，但諗起去美國嗰種麻煩，立即冇乜心情。美國在感恩節前實施機場全面檢查，對每一個乘客都做全身透視掃描，男女私隱全部在安檢人員眼前呈現；唔願意接受掃描者，要分別由男女安檢員全身搜查、拍打、摸索，於是出現一啲尷尬場面，如義乳跌落嚟，尿袋漏尿等等，引起美國保守分子及自由派人士憤怒與反對，但美國本土安全部堅持不改，寸步不讓。
咁麻煩，皆為反恐，但專業恐怖分子好難會在機場檢查時發現嘅，呢啲程序只會對百分之九十九點九嘅普通旅客增加麻煩與不便。我地去美國本土旅行，每次上飛機都麻煩到極，費時失事，全世界有咁多地方好去，美國有乜特別大吸引力呢？一時之間諗唔到，為咗公事或探親就冇得講啫，為咗旅遊就多謝咯。
突然間諗起，香港與其他亞洲機場點解咁太平，毋須採用美國嘅擾人方法呢？與居住香港多年嘅美國人S傾起，佢微微嘴咁話：「我觀察多年，我認為香港警察、機場保安人員早有檢查對象，不過係只做，不說而已，例如我係美國人，從未在機場受截停，但識得一兩位南亞裔、中東裔朋友，佢地就自己覺得俾機場保安到實。嗱，呢個做法在美國叫做profiling，人權主義分子堅決反對，聯邦政府唔敢做，於是咪全人類都要受檢查，以示公平、平等，沒有歧視囉！」
經佢一提，自己亦醒起每次在香港機場上機落機，好似都係直行直過，十分輕鬆嘅，所以我愛香港機場，外國遊客亦好喜歡香港機場，但在貌似鬆散嘅背後，香港機場安檢人員必定已經做咗唔少工夫，心中有數。
前美國眾議院議長NewtGingrich在霍士電視大發牢騷，指美國每次拉到嘅恐怖分子、嫌疑恐怖分子，都係年輕中東裔伊斯蘭教徒，但美國本土安全人員從來唔敢「特別照顧」呢類人，而強迫所有美國人在機場受羞辱，為何如此？睇吓陶傑點評歐美就明白o架嘞！