前高官梁展文退休後下海幫大地產商新世界打工，惹來官商勾結質疑，即使梁展文匆匆辭職都未能甩身，立法會成立專責委員會調查，經過好多個月聆訊後，調查報告明天正式出爐，八方聽聞報告長達400多頁，經手審批梁展文去新世界工作嘅高官，幾乎無一倖免被批。
不過亦有官員可能獲讚，已退休嘅發展局前常秘麥齊光，曾兩度提出新世界聘用梁展文有「公眾觀感」問題，如此心水清，八方希望調查報告畀個「叻」佢。呢個報告份量十足，立法會秘書長會將聆訊過程原語逐字記錄本製成電腦光碟，隨報告公開，有興趣知道呢單高官退休下海搞到一身蟻事件詳情嘅市民，可以買返屋企慢慢睇，報告盛惠148元，光碟每張72元。