「呀吓~我要飛往天上！」去resort度假已經夠晒free夠晒嘆，今次去泰國沽島仲要free到升天，坐藤籃吊上三層樓高為的是望住暹邏灣食個早餐，飄飄然嘆到我都唔多想返香港。
記者、攝影：蕭漢祥
三層樓高樹頂 眺望暹邏灣
享受之旅之前，是一輪舟車勞頓：由香港飛往曼谷機場再轉乘私人飛機，一小時後抵達Maisi機場，再轉快艇5分鐘到resort！今次目的地沽島（KohKood）位於暹邏灣海域，泰國與柬埔寨接壤邊界地區，SixSenses去年就在沽島西北部開設了SonevaKiri。
今次旅程唔多有機會腳踏實地，好多活動都不在地上進行，例如在最新的TreePod上用餐，TreePod是可負載4人的大藤籃，客人坐進後會升上約三層樓高的樹頂，眺望着暹邏灣用餐。侍應會從另一邊工作台準備好餐飲，然後扣着攀山威吔、單手捧餐飛過來，難度分滿分！吊籃只得一個，每日早或午或晚餐都只serve一籃客人，個人認為睇風景最好feel是早餐時段，但想影張靚相俾大家都feel吓就有難度，皆因坐在吊籃要扣上安全帶，且不可站立不可離開座位，小記曾走出吊籃，去到並無圍欄、只能容納三人的工作台影相，感覺好危險！嚇到侍應哥哥即時飛過來制止。物以罕為貴，每位早餐價約$2,150，由三文治至平時已過千元的香檳套餐都可點。
魔鬼魚飛船
Resort除了多情侶住客，也多夫婦來度假，所以為小朋友而設的配套便不可少。這裏山邊有一隻似飛船又似巨型魔鬼魚的建築物，原來是小朋友的遊學天地。「飛船」以藤和木依山坡興建，前端似昆蟲吸管的是滑梯，內裏兩層同樣由藤建成，有玩具室、美術室、圖書閣和溫習區，兒童樂園有專人照顧小朋友，父母可以安心去嘆。不過，在咁新奇好玩的環境下溫書，小朋友真係可以專心安坐？
JungleSpa大釋放
人在resort，嘆spa係指定動作。做spa之前先要做一份簡單問卷，了解你的生活和飲食習慣，導致你疲勞的原因等，按摩師再因應各人情況調節力度與部位。咁細心原來有原因，spa的經理TaniaHo原來係來自香港，在高壓城市生活過，令她特別懂得如何釋放壓力，做甚麼spa可重新注入能量。Tania推介一個JungleEscapeSpa，顧名思義spa的場景夠晒wild，療程先在室外叢林進行，按摩師會用天然草藥、有治療效用的石為你按摩；然後回歸室內，再用按摩油按摩鬆弛。我最愛這裏播放的純音樂，感覺就像靈魂出竅飄飄然的。
費用：JungleEscape$3,350/2小時30分鐘、ChakraBalancing$462/20分鐘
赤腳NoNews!
無憂之旅由落船一刻，服務員送上清新檸檬味手巾和「nonews,noshoes」環保袋開始。房內的電視沒有新聞節目，目的當然是想你拋開日常煩惱啦，亦鼓勵客人赤腳在島上走來走去，融入大自然。數十間別墅分佈於沙灘旁及山邊，大都是單房獨立式別墅，還有四至五房的巨型豪華別墅，中心地帶為共用大廳，開party一流。每間房都有開放式浴室，當然遠處也有屏風遮擋，面對大自然洗澡真係爽爆！這裏還有稱為Mr或MsFriday的管家，由娛樂至飲食，只要按resort提供的手提電話快速鍵，Friday就會快速幫你乜都搞掂，的確無憂。
SonevaKiri
每晚房價：單房獨立屋約由$7,560起，豪華別墅約由$21,746起
查詢： http://www.sixsenses.com/soneva-kiri
TreePodDining
溫馨提示：Resort會安排八座位私人飛機，接載住客由曼谷飛往沽島。因飛機細小飛行時飄飄哋梗有，怕暈浪者最好帶備暈浪丸。
TravelMemo
持特區護照或BNO免簽證。泰國領事館：25216481
國泰航空香港曼谷來回機票由$2,180起。
查詢： http://www.cathaypacific.com
1港元約兌3.9泰銖（文中價錢已折算港元）
220V，兩扁腳插座
泰國
沽島
下周有雨，23-30℃
