Viano部屋空間　桌桌有餘

MPV七人車給人最深刻的印象除了是近年富豪必備的中港車，其次就是明星開工必備的保母車。平治全新Facelift版的Viano3.5L改頭換尾之餘，重新調節底盤和引擎，強化車廂的寧靜同舒適度，睇埋七座附設的多功能摺合桌、如部屋的空間，一架不折不扣的明星保母車就在眼前。

記者：許維雅
攝影：譚盈傑
Model：Betrys@GME

底盤大執　加強舒適

日圓不停攀升，日貨一水貴過一水，唔少車主都有意轉投歐洲車懷抱！平治乘勢於年尾推出Viano的Facelift版再谷一谷，要在MPV市場分一杯羮並非難事，絕對有實力搶富豪及明星客仔。
今次Viano推出小改款，其實較着重提升行車時的舒適度，工程師只保留原先的前後軸，重新調校過底盤，令避震軟硬感覺適中，再強化吸震措施、改良結構、隔音及封口，令車廂噪音減至最低，提供更寧靜的休息空間，對於經常坐長途車的車主或於車內等埋位的明星，夠晒體貼。
長闊高達5,008×2,253×1,875mm的車身，內櫳空間大得有點嚇人，再將中後排座椅移動至對坐方式，加埋七座原裝配備的摺合式工作枱，走進車廂的感覺猶如走入一間小部屋，要開餐化妝，還是開會都方便得多。加上兩側車窗及尾玻璃都配置反光窗簾，私隱度極高。

■將中後排椅對坐，令寬闊內櫳空間更誇張。

■拉起兩側膠板便可變身做工作桌，張枱夠晒大，化妝開會一樣夠用。

■打開摺合桌的按鈕是氣壓式設計，要大力點向下壓。

棄圓碌採方角

全新Viano換上起角的菱形車頭Bi-xenon燈組合，再配上LED日間照明燈，兼備自動轉向及清洗裝置，型咗又實用咗。而鬼面罩亦用上電鍍粗三間的新設計，加埋略帶V-shape的新車頭擾流，令整體面貌輪廓更鮮明，無上一代咁圓碌碌。至於車尾的改動，就只有將尾燈縮短，高度由之前延伸至車頂，縮短至尾到玻璃底部，不過愛招搖的我反而較欣賞上一代的搶眼尾燈。
至於引擎方面，3.5公升的V6引擎容積不變，經改良後的油耗及廢氣排放表現經已符合歐盟五的標準，258匹馬力、340Nm扭力即使要應付巨無霸車身或逃避狗仔隊當然絕無難度啦！
Viano繼續斯文大方，相比起日系MPV，可以話各花入各眼，但論車價就一點也不遜色，維持六十幾萬元不變的價錢，相差些少，點都好似有個三星標記比較吃香，尤其一班要Face的富豪明星總會要豪一點。