由高中到碩士畢業都讀美國番書嘅財爺曾俊華，忽然狂like中國文化，噚日喺網誌勁讚動態版《清明上河圖》具鎮懾力，話作者大膽創作，令佢驚嘆「咁都得」。香港A貨版已經搬返上海，家仲講確係幾out吓。
原來財爺係借意翻兜佢喺8月以「港台經濟文化合作協進會」榮譽主席身份訪台灣嘅情景，話參觀過台北故宮博物院嘅「巧雕玉石展」，工匠化腐朽為神奇，成為可媲美名畫《蒙羅麗莎》嘅藝術品。
財爺仲充當兩岸關係嘅親善大使，差在未用埋台語。佢話從《清明上河圖》到「翠玉白菜」，可以窺探天人和諧、量材就質嘅中國文化喎。創造和諧？講嚟講去始終跳唔出河蟹心態。