29匹來自英國、愛爾蘭等地嘅頂級馬準備就緒，下周日（本月12日）喺沙田馬場同「本地薑」一較高下，喺四場國際一級賽中爭奪合共6,400萬元獎金。
一年一度嘅國泰航空香港國際賽事係馬壇盛事。賽馬會賽馬事務執行總監利達賢話，以每匹馬「一拖十」嘅人數計算，單係海外馬匹嘅隨行人員已經有近300人，加上外地傳媒同埋各地馬會高層等嘉賓，預計賽事最少吸引2,500人訪港，當中嘅旅遊收益多達2,000萬港元。
眼見國際賽事咁叠水，馬會上月成功將三場本地賽事升格至國際二級賽事，加上贊助商科水，令香港國際賽事日數由每年兩日加到5日，有馬跑，最開心應該係班馬迷！