「五區總行動！」又搞公投？非也，原來係「爭取留巴總」。保育團體尖碼之聲噚日喺尖沙嘴、紅磡、黃大仙、深水埗同美孚發起一人一信運動，反對將尖沙嘴天星碼頭巴士總站改建露天廣場，一日就收到逾3,000封市民簽名嘅反對信。搞手Leslie話巴總係九龍區巴士線樞紐，旁邊五支旗杆又滿載港人集體回憶，亦方便市民乘搭票價唔貴嘅天星小輪來往港島，堅持要保留。
冇公開諮詢民意
Leslie同八方講，政府今年10月再將梳士巴利道同廣東道交界迴旋處工程重新刊憲，但又冇公開諮詢民意，堅持封閉尖沙嘴碼頭巴士總站，更以擴闊路面為由，縮減的士站範圍，咁做只會令交通更擠塞。佢話，新建嘅麼地道巴士總站只得兩條巴士線，用嚟畀旅遊巴停車上落客好過。佢哋會繼續收集市民反對信，今個月21日將所有信件呈交特首辦。若政府仍一意孤行拆毀呢個巴士總站，睇怕天星、皇后碼頭抗爭事件又會重演。