帶領獅子行度過金融海嘯，同埋世紀供股集資呢啲艱難歲月嘅「牧師賓卡」──滙豐控股（005）前主席葛霖，原來上周三悄悄嚟咗香港，接受由滙豐亞太行政總裁王冬勝精心安排嘅歡送晚會，地點就借用咗廚藝一流嘅恒生總行24樓仁愛堂。
即晚飛倫敦趕第二場
當晚出席嘅賓客成百幾人，晚會以滙豐銀行董事會名義舉行，成班董事包括查史美倫同小超人李澤鉅等都有到場。華華聽聞，煲呔曾都畀面現身，證明回歸後獅子行雖唔再係行會成員，但係威力猶在，特區政府都隆而重之。
服務滙豐28年嘅葛霖，當然唔少得喺晚會上緬懷一下歲月，不過佢確實係大忙人，飲完滙豐銀行餞別宴，當晚就搭夜機飛返倫敦，出席滙控董事會為佢舉行嘅另一場歡送會。
經歷次按風暴同世紀海嘯吹襲，舊年頭獅子行股價一度跌至接近供股價新低，謙厚低調嘅葛霖雖然鞠躬盡瘁，但係作為集團主席，始終要面對捱鬧多過掌聲嘅殘酷現實，所以做大班行運定係倒楣，都要睇天時地利人和。
講番餞別宴，華華記得，喺任內併購北美滙豐融資，搞到葛霖接棒後一身蟻嘅前大班龐約翰，佢喺06年5月榮休嗰時，滙豐亦喺恒生大樓為佢送別。