噚日係國際義工日，滙豐愛心傳城義工大行動，都揀咗喺噚日舉行誓師禮，雖然晨早流流，但係滙豐亞太區行政總裁王冬勝（圖左二）都好畀面撐場，除咗打鼓激勵士氣，之後仲去咗唔同嘅服務攤位，為義工打氣。去到由護協幫手嘅攤位時，王冬勝親身示範畀護士姐姐量血壓，護士叫佢放鬆啲，佢就望住班攝記笑笑口話：「見住佢哋點放鬆到！」
血壓嘅結果係：收縮壓（高壓）159、舒張壓（低壓）99，即係點？護士姐姐話，正常嘅應該分別係唔高於140同80。咁王生咪血壓高？護士即刻解畫，因為王生頭先行入嚟、講吓嘢，心情緊張都會令血壓上升，係正常嘅！經常打高球嘅王生，身心都保持最fit狀態，血壓無端端高咗，唔通真係因為華華同啲行家？