有政黨由原來反對申辦亞運會，轉為立場飄忽，班高官唔死心，四出拉攏議員埋堆，好似早排佢哋就出手搞掂工聯會，不過剩番落嚟嘅通通唔係善男信女，唔計泛民，就算係保皇先鋒民建聯，都一早講明唔支持申亞，大家講口唔掂，惟有講手。噚日民建聯搞運動會，政府就組隊落場「玩鋪勁」，表面上大家笑騎騎，但就暗地裏勁交鋒。
民建聯疑似放水
官民角力，形象分梗係唔少得，為咗營造出熱愛運動呢個image，煲呔日前去咗踩單車，一班後生嘅副局長同政治助理自然唔敢怠慢，噚日落場同民建聯代表喺運動場鬥過。至於批局長就睬你都儍，唔通叫孫公跑短跑咩？
政府決心有幾大？睇吓二人三足比賽就知道，班副局同政助派夠幾隊人落場，八方見運輸及房屋局副局長邱誠武同拍檔教育局嘅楊哲安搏晒老命，鼓埋泡腮係咁跑，擺明要贏冠軍，主場嘅民建聯反而一起步就執輸，疑似放水，一副志在參與咁款，結果冠軍當然由邱武隊奪得，民建聯第二，第三就畀兩位女副局長梁鳳儀同黃靜文搞掂。
輪到壓軸好戲扯大纜，民建聯講明玩樂性質，政府代表繼續非常認真，煲呔蹺住手當打氣，德成局長擘大喉嚨叫加油，交足晒戲，成隊人包括教育局陳維安、楊哲安同邱武個個都磨拳擦掌，雙方拉扯一輪，唔知民建聯留番啲年輕力壯成員有後着，定係故意讓賽輸咗。搞到成班官仲high過中頭獎，唔停咁叫「givemefive」，有人仲嘆咗一句：「終於都拉番民建聯過嚟啦！」
否認為申亞造勢
如果班官以為自己得米，就真係好儍好天真。識得玩政治嘅民記主席譚耀宗，完場嗰陣氣定神閒，話家陣反對申辦亞運嘅立場未變，即係時機仍然唔成熟，就算呢個運動會，亦唔係幫申亞造勢，純粹同官員運動吓、交流吓，冇乜其他意思。
煲呔呢仲未拉到民記返政府嗰邊，只係上台攞咗幾個「愛自己愛地球」攬枕，嚟緊仲話要向自由黨埋手，德成局長不如善用吓啲攬枕，發個好夢算啦。
mailto:[email protected]
