煲呔繼上載盛裝踩單車嘅「生活」片段上facebook後，噚日搵嚟歌手梁詠琪Gigi一齊做show。Gigi喺fb話一早約咗特首做義工，響應一年一度嘅國際義工日，諗住去探有需要小朋友，喺網上收集意見，睇吓去邊度探同埋送乜嘢禮物好，點知網友反應冷淡。有人建議佢哋探吓生活喺貧窮線以下嘅小朋友，隨即有網友搭嘴話咁多小朋友活喺貧窮線下，係因為煲呔無能、施政失誤，有人仲直接叫特首唔好再做show，快快手手解決貧富懸殊同埋蝸居問題。計八方話，探邊個唔重要，最緊要煲呔識乘機向Gigi偷師，話晒Gigi成日代表志願機構探訪貧窮地區，對住鏡頭聲淚俱下，煲呔表現有佢一成，民望都大幅反彈啦！