有無試過發夢墮樓或者甩牙？專家話呢啲夢，好多人都發過；但係講到夢中有夢，仲幾乎唔識醒，就睇怕無乜人試過！本周新碟《潛行凶間》，BD以雙碟炮製，除148分鐘精采劇情，更專訪精神學家，同大家解構怪夢，想知入面有無自己Case？咁一定要煲埋Bonus！
記者：陳國輝
翻煲幾次先夠
入過戲院就唔使畀錢買碟，錯晒！可能小記理解能力差，戲院睇完一直唔明。《潛》嘅基本故事架構，就係講里奧仔點樣潛入別人夢境，再控制對方、盜取內心秘密！概念好特別，初時更出現大量特技，例如城市街道會反轉，火車突然駛近身邊，甚至乎無端端有巨浪衝入屋！
但睇到中後段，大家就開始走火入魔，夢中有夢，而且仲係幾層咁多，人物角色仲會跳出跳入，逐層破解，頭都暈晒！或者，呢類深奧劇情對Fans嚟講係一種挑戰，唔睇個明白誓不罷休，所以買隻碟返去煲十次、八次，真係抵晒o架！
屋內瀑布解謎
劇情係點都係留番俾大家慢慢睇，重點想講係，A碟Bonus包括拆解戲內十三段夢境；例如屋內瀑布效果係點樣製造出嚟，當街上汽車發生爆炸嗰刻，點解隔籬個人會乜事都無；我個人更想知道，所謂嘅「三角階梯」係點樣令人產生錯覺，呢堆咁有趣嘅資料，入戲院都無得睇！
B碟內容仲訪問多名精神學專家、腦科專家，由佢哋親自講解發夢嘅成因，並解構一啲怪異夢境行為，而且仲有CaseStudy，就好似睇緊Discovery節目一樣，內容長達過百分鐘，超認真！
Profile
片種：劇情
畫面：2.4:1
音效：DTS-HDMA5.1、DD5.1
特別收錄：ExtractionMode、Dreams:Cinemaofthesubconscious、5.1Soundtrack
