"畸寶播波冷待知己"
友儕及同事間，對於今屆英超轉飯鑊播波，常有唔少意見。多人睇自然意見多多，大家最唔滿意嘅梗係畸寶冇「現在台」咁方便有個ondemand服務，可以錯失直播後，當唔知賽果，隨時隨地可以重溫比賽，家就唔得。英超比賽途中，經常硬銷叫人玩贏電視機嘅最佳球員遊戲，準則喺邊度，幾主觀啩，獎品有幾豐富，有幾多人受惠？大家心照，這個都係願者上釣，冇乜大問題。小弟最唔滿意，係直播嘅賽前賽後難得見到嘅鏡頭，唔知係咪遷就廣告，CUT到你估佢唔到；好似上個禮拜六喺屋企睇波，去到11點曼聯對布力般，可能生意好得滯，係咁播廣告，結果去到開咗波廿幾秒先去番現場，如果我冇眼花，真係有啲離譜。賽後想睇吓兩邊球員嘅神情，握手同球證拗數嘅鏡頭，對唔住，通常導演都好快落柯打就叫去廣告，返到嚟，有時甚至連重播入球都欠奉，你大可以之後等陣㩒番去新聞台重溫。評述中，相信大部份都係專業，但係如果唔係喺球彩台播，點解成日聽到有位長髮評述員，經常以爛GAG粗鄙嘅言語講波；希望有關方面可以改善，唔該！
"天氣轉冷 生財有計"
我唔係好怕凍，不過預計今個冬季極寒嘅天氣，先在電視機嘅足球場上，看到歐洲漫天風雪中體現；香港下周中也轉凍，難為怕冷人，波友捱夜睇波，尤其係西甲粉絲，記緊多穿衣保暖，好似今日皇馬迎華倫，聽朝5點至開波，未凍但有幾人捱得到睇呀？凍啲，相信香港大部份生意人也樂見，零售業持續大旺，10月黃金周數據已靚爆，嚟緊聖誕及新年假期又如何，要有錢消費吓，家買番啲龍頭消費股同追收租股，未遲。見到「場地」起變化，貼冷門心更雄，周中貼韋斯咸同葉士域治冷W都中得到，今個周末，一於繼續扒冷。
"日聯閉幕鯨魚W偏冷再捧"
日聯同日乙今天閉幕，澳職波水準低，好爛路唔係咁好賭，短期內，波友少瓣娛樂。大局早定，雖然今天跑馬，都要參與埋呢鋪。冠軍隊鯨魚迎三箭謝幕，後者連教練柏杜域都去咗奧國做手術，由助教埋尾，戰意極有疑點，鯨魚班明星應該做場「大」騷益球迷；冷門捧主場山神，衞冕失敗嘅鹿角讓唔起。
"再信黑池博冷僵紅魔"
天冷，連英國競逐主辦世盃都大熱倒灶，英國漫天風雨下，幾級聯賽有得打都兵凶戰危，場地起變化，周中葉仔同韋記都係咁爆出，故今周英超精選仍屬黑池主場迎曼聯。冰封氹仔浸紅魔，7.5倍主W唔會手軟，入到波o架，唔信可博入球「大」；另博勢強嘅保頓作客鬥曼城不敗，後者周中歐霸盃大炒未夠證明主場回蘇，保頓[+1]同冷W也值博。
"周一好戲連場冷選維拉"
呢個月起嘅周一英超場，不乏好戲碼，捱凍都要睇，今周維拉赴利物浦市，打突擊有力出冷；下周一曼聯迎阿仙奴；月尾嘅周一到阿仙奴鬥車仔，有得禮拜二放例假嘅波友，就最值得人羡慕咯。
文：蘋果波神
語錄：謝幕波同場地起變化，戰意及發揮難測，冷門客有機了。