煲呔同佢個問責班子仲有兩年任期就收工，煲呔肯定冇得再連任特首，叠埋心水等退休，但佢個問責班子部份人正值當打之年，有冇得留低再做落去，自然好受政界關注。不過噚日八方忽然聽到傳聞，一直民望唔差、又年輕力壯嘅律政司司長黃仁龍話想唔撈。更驚嚇嘅係，有傳聞話仁龍仔未必等到同煲呔共同進退，而係提早走人，連接班人選都曝光，就係現任基本法委員會港方委員莫樹聯資深大律師。
八方聽到呢個消息，即向法律界中人收風，有資深大狀同八方講，仁龍仔唔想再做律政司司長個位，大狀界好多人都聽過，事關仁龍仔正值當打之年，貢獻社會、報效國家七年，真係乜都夠皮，係時候重出江湖搵真銀，況且第二時阿爺若然要佢再為特區發光發熱，以仁龍仔年齡同民望，做終審法院首席法官又得，出嚟run特首又得，真係大把機會！
不過資深大狀又話，真係冇聽過仁龍仔要提早走人，事關煲呔餘下任期僅兩年，「真係更惡頂都頂埋佢喇」。所以佢估計仁龍仔2012年後唔撈機會有九成，即時唔撈機會唔大。江湖傳出仁龍仔唔撈咁大件事，空穴來風，八方梗係問律政司司長辦公室有乜回應，司長發言人斬釘截鐵話「絕無其事」！官府對江湖傳聞咁緊張，更加令人思疑真係有啲嘢喎。
畢業生抗議表揚詩姑
黃仁龍噚日去樹仁大學畢業禮時無異樣，致辭時勉勵學生要擇善固執，不屈不撓，有冇弦外之音，大家自行參詳。而典禮上其中一個畢業生葉浩意，就同戰友楊匡一齊舉標語抗議，反對樹仁頒發榮譽法學博士俾前律政司司長詩姑，因為詩姑放生胡仙，破壞法治，不應獲表揚。
至於仁龍仔傳聞中嘅接班人莫樹聯，有法律界中人同八方講，佢在大狀界入面算係後生一輩，早幾年先takesilk做資深大狀，不過都做過幾單大嘢，當年教院風波，佢代表政府為官員無干預學術自由辯護。
莫樹聯同一班愛國愛港大狀胡漢清、廖長城關係好好，特別係同胡漢清最friend，被視為佢嘅愛徒，否則又點會俾阿爺相中，咁後生就做基本法委員會委員，同詩姑、譚惠珠呢啲又紅又專法律界中人一齊做委員！如果真係被阿爺睇中，莫樹聯真係時來風送升城隍，八方問資深大狀點睇莫樹聯上位，佢高呼：「唔係啩！唔好吓嘛！」
mailto:[email protected]