傳說中的千年女王，復活了。47歲的露雲娜（RowenaCortes）擁有的不止是一把甜美聲音，她的《荳芽夢》、《情像外衣》、《飄忽的愛》和《雨中shalala》等少女歌曲，更有一種如羊胎素般令人回復青春的魔力。冰封23年，露雲娜終被熱情歌迷融化，重出江湖。回味當年哥哥張國榮暖暖的手拖住自己上台領新人獎，又或是第一眼見到俊朗的郭富城為自己MV伴舞的「醒神」感覺，每一幕都是露雲娜的青春印記。今日，就讓露雲娜帶大家一起回味那小荳芽夢。 撰文：戴彩煥
露雲娜5歲便參加歌唱比賽，一唱唱足23年。很多人以為露雲娜會為失去正常的童年而感遺憾，但其實她活得比任何一位小朋友都開心，因為她永遠是年紀最小一個，永遠得到身邊哥哥姊姊痛錫。她說：「唔會唔開心，我都有自己朋友，一樣有童年生活，我細細個已鍾意唱歌，覺得自己mission係唱歌。」
多得肥姐關照
1977年，露雲娜還是14歲，她已跟張國榮同台領取樂壇新人獎。「好記得當晚我隻手好凍，佢（指張國榮）拖住我隻手，好照顧我，上台嗰陣又叫我唔好驚，成個大哥哥咁。」她續說：「《EYT》嘅何守信、梁醒波同沈殿霞都好錫我，嗰時木人巷（昔日無綫廣播道總台錄影廠外通道）好凍，波叔怕我凍親，成日攞自己件棉襖畀我着，肥姐就成日叫人唔好蝦我，可能自己永遠都係最細嗰個，所以個個都好錫我。」
除了螢幕情侶賈思樂，露雲娜跟張國榮亦合作不少，包括電影《衝激21》和《檸檬可樂》。「好掛住佢（哥哥），以前成日去佢屋企玩，六姐（哥哥的老工人）會煮好多嘢畀我哋食，我哋成日行街睇戲食嘢，可以3日3夜唔瞓。嗰時拍完嘢就去佢屋企打牌，打到開工，收工之後又打牌。」
掛念去世好友
露雲娜拍過不少青春片和電視劇，最令人印象深刻的，是與翁靜晶及周秀蘭主演的無綫劇《荳芽夢》，當年這劇跟蔡楓華主演的麗的電視劇《IQ成熟時》對撼，最令露雲娜難忘。當年無綫將《荳芽夢》中演Ronald的吳民雄塑造成萬人迷，但他卻被勁彈不夠英俊，露雲娜代為平反說：「佢真人都幾靚仔o架，佢係台灣人，雖然講說話唔清楚，但咁先至型。」
青春無敵的日子總令人懷念，露雲娜也不例外，偶然想起都會笑出來。「好甜嘅感覺，成班後生仔好夾，留低一個好回憶畀我。不過，有時坐低諗，點解一個二個咁後生就走咗？好掛住佢哋。」
87年露雲娜拍《手掌上的電話號碼》MV，男主角正是當年無綫舞蹈員郭富城。「平時開工要飲咖啡至醒，嗰朝6點化妝，一見到佢（指郭富城）咁靚仔即刻醒晒。佢都幾怕醜，唔敢同我講嘢。」
積極減肥復出
露雲娜正積極減肥復出，拍攝專訪當天，攝影師跟她說：「你肥肥哋幾好吖！」逗得露雲娜心花怒放。「個心幾甜呀！我減肥係想上台時有自信心啲，家最想唱番好啲歌，好掛住啲fans。把聲仲keep到，我諗呢個係我mission，要唱番歌。雖然我唔係18、22，但我唔介意上台唱番《荳芽夢》，最多到時拖埋個仔唱。」
露雲娜多年來退隱生活跟所有師奶無異，買餸煮飯湊仔外，更不時煲劇和上網睇書。原來她最愛看《大長今》及黎耀祥與鄧萃雯演的《巾幗梟雄》，她更看了三次《大長今》還感動落淚。無意中見到露雲娜拿出HelloKittyiPhone套，才知她也是Kitty迷，已做師奶多年的她，其實仍有一顆少女心。