楊千嬅同丁子高今個月20號會喺灣仔君悅酒店擺喜酒，前日大家先收完佢嘅喜餅，噚日就已經收到千嬅同丁生嘅喜帖，張帖係深紫色，設計得好靚，真係見到都戥呢對新人開心。
一向鍾意紫色嘅千嬅，當然連請帖都係用番佢至愛嘅顏色。張帖嘅封面有林海峰幫佢哋設計嘅logo，一揭開就見到有個立體圓形彈起，旁邊係千嬅同丁子高當日註冊嘅拉斯維加斯風景圖案，仲印咗佢哋註冊嗰間教堂LittleWhiteChapel同註冊日期，即係09年8月11日。
認帖唔認人
驚喜仲未完，立體圓形上面又有張銀色卡仔，原來呢張先係請帖，各位賓客到時記住帶呢張卡入場，千嬅解釋：「因為當晚開近50圍，有好多親朋戚友，我怕自己認唔晒，惟有認卡唔認人。」千嬅噚日四出派帖，之前佢同丁生為咗整好張帖，仲捱咗幾晚通宵，認真辛苦。
另外，丁子高噚晚喺中環出席Spa開幕，佢話分開派帖，先派咗500幾人嘅晚宴喜帖，再派400幾人嘅party請柬：「晚宴46圍，我同千嬅一人一半，每人23圍。」
動用過百萬
有傳兩人冇請黎明同鄭秀文飲喜酒，丁子高話：「有呀！發咗帖，但要睇佢哋得唔得閒，家啲位好緊張，我啲中學同學想話帶女友我都唔畀。」丁子高仲話禮金應該可以支付晚宴，又多得千嬅老闆林建岳贊助酒水，但婚禮製作同佈置等，佢都要用過百萬。
