若問誰是無綫藝員李嘉，相信觀眾爆頭都未必想得出，但一提到在《巾幗梟雄之義海豪情》內被鄧萃雯飾演的九姑娘用槍指着大罵：「你咁鍾意鞠躬，落去叫閻王同你鞠到夠喇！」然後她槍擊射殺黑木少佐，大快人心的一幕，觀眾都會拍手叫好，飾演黑木少佐的正是李嘉。
現年28歲的李嘉未入無綫前曾做過不同行業，計有輔警、解款員、搬運員及健身教練，機緣巧合下99年入行做龍虎武師，至今在圈中打滾逾10年，他及後因膝頭受傷而轉讀無綫藝員訓練班，由一年一騷的合約，轉為一年四騷的合約藝人，雖然派演只是死屍或閒角，但李嘉仍落力去演，直至黑木少佐一角令他上位有望，他日前在旺角接受訪問時說：「黑木呢個角色出咗街之後，嗰兩日行街成日有人指指點點，初初以為係以前練功夫得罪咗人，有一日行書店，有個小朋友過嚟問我攞簽名，先知道呢啲係善意嘅眼光，我從來都冇諗過會有人識。」
冇工開曾想放棄
李嘉把黑木少佐的陰險發揮得淋漓盡致，原來背後有段古，他說：「我有跟日本師傅學劍，玩過啲日本刀，而且又對呢類抗日題材有興趣，接咗劇本後，我都有問師傅同住喺北京婆婆當年往事，又當正自己係黑木，點解會咁憎中國，點樣做係武士道精神，呢方面對我幫助好大。」
作為演員卻要長期當暗星，感覺固然不好受，李嘉直認曾想放棄，他說：「做咗咁多年，冇嘢撈嘅時候都幾慘，冇工開咪要做兼職，所以初初都有諗過返北京發展，不過我真係好多謝添哥（李添勝），佢喺籮底摷我哋呢啲籮底橙上嚟用，難得有咁嘅機會，梗係要做好。」