財爺出招壓樓價，提出特別印花稅（SSD）打擊炒家，建議徵SSD嘅條例草案前日提交立法會準備審議，民主黨涂謹申睇完草案，大嘆官府今次出招真係絕到無人有。
SSD有豁免措施，包括遺產轉名物業唔使交SSD，但遺產物業轉名後，繼承人再轉賣，持有物業嘅生效日期，政府建議以先人買入物業日期開始計算，即係繼承人同樣受SSD措施影響，唔會因為物業係繼承遺產而獲豁免。
阿涂形容呢個建議真係好絕，事關不能排除有人想盡辦法鑽空子逃避SSD，以行將入木長者名義買入物業，同時立下遺囑，一待長者過身就繼承物業，以為可以免受SSD規限，點知官府連呢個咁刁鑽嘅法律罅都封上。