陽光妹何思諺（Leanne）雖然一直行文靜清純的少女路線，但她坦言若要為藝術犧牲，即使要她露點演出也在所不辭，她日前接受訪問時說：「好似《色，戒》咁為藝術嘅，要我露點都冇問題！」
提起何思諺，大家會聯想到她拍過陽光飲品廣告、曾出寫真的o靚模，其實Leanne入行後，曾拍過獨立電影，今年，更被文雋睇中，找她演出電影《李小龍》，飾演李小龍二家姐，她說：「開頭接嘅時候都以為會有動作戲，等我仲特登去練番泰拳，點知原來我個角色係好文靜唔多出聲嘅！」
戲中Leanne跟梁家輝、鍾麗緹等不乏對手戲，作為戲壇新人的她，直言起初很擔心會因演技差而被罵得狗血淋頭，她說：「開頭真係好驚，但係開拍至今爸爸（指梁家輝）一句都冇鬧過我，反而我出錯NG，佢仲會安慰番我，同教我應該點做，成個拍攝過程都好溫馨，我哋拍嘅中途已經好似一家人咁，就算家出嚟宣傳見到面，都係叫梁家輝同鍾麗緹做爸爸同媽媽嘅。」
自覺性向模糊
酷愛電影的Leanne，表示未來日子會投放多點時間於電影工作，問她最希望扮演甚麼角色時，她最希望嘗試扮演同志：「之前又睇過《蝴蝶》呢齣戲，所以多留意同志方面嘅嘢，覺得les（女同志）嘅感情好特別，我已經叫公司幫我留意吓有冇同志電影開拍。」Leanne續說：「其實有好多人都問我點解唔拍拖，可能佢哋見我之前個look都比較男仔頭，所以問我係咪les嘅，我家都分唔清，讀書時都曾經試過有女仔同我表白，但當時覺得只係好朋友所以拒絕咗。」現時也有男生追求Leanne，但她直言視男方為朋友，更指現階段並不急於拍拖。
為藝術冇底線
自言接受能力奇高的Leanne，談到拍電影的底線時，她想了想，認真地說：「其實乜嘢都得，我接受能力好高嘅，但係好似《3D肉蒲團》呢類意識上係賣弄色情嘅就唔得，但係好似《色，戒》呢種為藝術嘅，要我露點都冇問題。」
一直視周迅為偶像的Leanne，最希望能跟她合作：「佢做嘅所有戲我基本上都睇晒，佢係個好有性格嘅演員，就咁睇佢嘅訪問，我都已經有好多得着，同埋最重要嘅一點係我同佢同月同日生日，哈哈！」
採訪：譚倩宜
攝影：林德雄
髮型：Sunnyofhairculture