活樂遊1：WEEKEND好旅程廣州百蚊喪食　輪街嘆煲女飯

食買玩，今日個個上廣州都熟過地頭蟲，本來上廣州想shopping的，不過有廣州導遊和曾在廣州蒲的美少女亂食神同行，食吓一間又一間，不知不覺已是日落西山，迷失在上下九之間。沒法子，今回就同大家飲飽食醉先啦！

記者：柴敏
攝影：林伯
模特兒：Paris@PureModel
鳴謝：康泰旅行社

這回的目標，我為了個名搞鬼的煲女飯，Paris則由香港、葵園一直吟要食缽仔糕吟到上廣州。那個招牌飄香煲女飯餐廳，不過是條後巷的檔口仔，要不是影相更是枱都無張，個個坐在膠椅上輪街症似的捧着粥粉麪飯來食，地踎之極。
以為有甚麼起碼寫百幾二百字的野史故事，阿嬸指指個煲「呢個（煲仔飯）有柄，嗰個無柄吖嘛！」隔籬雞仔嘜阿伯咦住金牙在吃吃笑，我們deadair。阿姐又話：「因為我們用數碼煲飯，味道不同嘛！」乜嘢數碼呀？原來係講緊電磁爐，所以燒出來的飯火力平均，沒那麼燶及濃的炭火味。即刻無晒神秘感！照食啦！然而這飯製作都好認真，近十種配料放得滿滿的，配上現炒的青菜，飯燒得剛剛好，煲邊的飯焦薄薄的沒有變黑，像吃脆米餅，淡了炭火味，飯味倒是比較香濃，意外的好吃！阿姐還說沒那麼熱氣呢！

■煲女飯配料近十種。每煲8-15元

■煲飯約需15分鐘，上面的排骨滿滿無偷工減料，配上即炒菜心。15元

比煲女更火紅的，是同場Paris極讚的迷你缽仔糕。有十幾種口味，紅橙黃綠青藍紫，草莓、朱古力、菠蘿、青蘋果、紅豆、綠豆、黑芝麻，每日賣成千個！Paris：「呢啲七彩缽仔糕，成條街有好多間o架！但食來食去都係這家最煙韌彈牙！老細話佢哋係用新鮮果汁溝木薯粉來做，為了令果味濃一點還寧願買貴點甜點的水果而少加糖，同其他用果汁粉溝的缽仔糕唔同味。最香係菠蘿味，裏面真係有少少菠蘿絲你咬……」

■彩色缽仔糕看來像玩具，初看，查實不太敢食的。3元2個

■十幾個缽仔糕口味，奶黃同紅豆味總係特別早賣完，要食請早。

去上下九食南信都要你教？唔使啦！我知吖！當日我都這麼跟廣州地膽導遊說。然而他們以一個insider的身份話我知，在廣州人心目中，南信≠雙皮奶，卻=牛雜店。廣州的牛三星已由街市雜碎小食，升呢成為酒桌上的小菜，一條街可以有三四間牛雜店，但煮法卻來自五湖四海甚至內蒙古，南信的反而更有廣州味。一碗好的牛三星，首先肉要鮮，味要夠！牛肝牛腰同牛心燙熟後用湯爆方法混調料，加上前菜上桌，是昔日廣州阿媽三兩下就煮得了的小菜。

■牛三星（9元）即是牛肝、牛腰同牛心，其中用上湯煮一天的牛心都碎掉了，跟肥膏捲在一塊像肥豬肉。香滑的雙皮奶（7.5元），奶味極重，得獎無數都無謂再講。

不知有無吹水，紅透上下九的銀記腸粉，據講每日可賣腸粉五千碟，蔡瀾還為其題字「以腸為王」係威係勢。晚上七點幾，一個唔係好應該食腸粉的時間，但舖頭仍係好逼，雖不至於下下排隊但都得等位，一轉身個袋就會掃中人的那種。食了幾十年腸粉，皮要薄米味香，白雪雪滑嘟嘟但又要彈牙，已是我們由大牌檔食到高價酒樓對一紙腸粉皮的要求。但平時食開的都是用大鐵鍋，將米漿蒸熟的腸粉，銀記用的卻是秘技布拉腸粉，在加熱的鐵皮上加塊紗布，打下米漿，蒸熟的腸粉連布一起撻在桌面撕出，卻都沒有跌散。捲着配料的粉皮透薄香滑得來還記得彈牙。出名的牛肉自是嫩滑多汁，但個人最愛粟米腸，食得出香滑的腸粉味。

■除了招牌牛肉腸粉，蝦腸都非常鮮美。5元（小）、7元（大）

■店裏總係坐滿人，即使已是晚上七八點。

■一日五千碟腸粉都由幾個阿姐輪流撻住紗布做。

■單車仔改裝的大單車，好可愛呀。

■只係一條小巷之隔，就同對外面大街感覺完全不一樣。巷仔常塞滿人食糖水、煲仔飯同小菜。

■在上下九撞見賣飛機欖的，當年他們為吸引小朋友，個個都會扮大公雞賣飛機欖，但今日問番阿叔，連他都不知為何要扮雞呢。

鼎鼎大名的老字號，廣州有好多家仁信，但據廣州insider而言，要食就只得泰康路一家，其雙皮奶都係得獎名品。而曾縱橫廣州的Paris話：「我每次來廣州都要跟爸爸來食手磨芝麻糊同雙皮奶，食得多皮膚滑多啲呀。」泰康路仁信要求特別刁鑽，用水牛奶來撞奶燉奶都算，那些水牛只食水草、雞蛋同糯米糖餅長大；蓮子要去市場買新鮮的回來逐粒剝皮去芯；芝麻糊也要現磨的，吃起來才夠濃夠香。

■這裏的雙皮奶奶味沒南信那麼濃，但打隻蛋落去撈混，別有一番香味！每碗8元

活樂遊1：WEEKEND好旅程廣州百蚊喪食 輪街嘆煲女飯

活樂遊1：WEEKEND好旅程
廣州百蚊喪食　輪街嘆煲女飯